Bu haqda RBK xabar berdi.

Maʼlum boʻlishicha, aeroport 2025 yilda sobiq egasi Dmitriy Kamenshikdan tortib olinib, davlat tasarrufiga oʻtkazilgan edi. 29 yanvar kuni oʻtgan auksionda «Domodedovo» «Sheremetevo» aeroportiga qarashli «Perspektiva» MChJga sotildi.

«Sheremetevo» ulushlarining 30 foizi davlatga, 66 foizi esa TPS Avia Holding trastiga tegishli. Ushbu trast 2022 yil oxirida Rossiyaning Russkiy orolida qayta roʻyxatdan oʻtkazilgan. Trast aksiyalarining 34 foizi Rotenbergga, qolgan qismi esa tadbirkorlar Aleksandr Ponomarenko va Aleksandr Skorobogatko oilalariga tegishli.

Auksionda «Domodedovo» 66,1 milliard rublga sotilgan. Bu aeroportning boshlangʻich narxi — 132 milliard rubldan ikki barobar arzon. Savdolarda Rotenberg bilan bogʻliq kompaniyadan tashqari faqat «Vnukovo» aeroporti tuzilmasi qatnashgan.

74 yoshli Arkadiy Rotenberg yoshligida Vladimir Putin bilan dzyudo toʻgaragida tanishgan. Ukrainaga qarshi urush boshlanganidan soʻng u xususiy aktivlarni davlat tomonidan tortib olish jarayonidan eng koʻp foyda koʻrgan shaxslardan biriga aylangan. Bu jarayonda umumiy qiymati 4,5 trillion rubl boʻlgan aktivlar davlat nazoratiga oʻtgan.

Rotenberg, shuningdek, «Rosxim» xoldingiga qarashli bir qator kimyo korxonalarini ham sotib olgan hamda «Salavatneftemash» korxonasini boshqaruviga olgan. 2025 yil oxiriga kelib, unga oʻtgan aktivlar qiymati 168 milliard rublga yetgan.

Rossiya Transport vazirligi yangi egadan aeroportda toʻplanib qolgan muammolarni hal qilishni kutmoqda. «Domodedovo»ning qarzi 70 milliard rublni tashkil etadi, uning yarmi xorijiy valyutada. Mutaxassislar hisobicha, 2026 yilda kredit toʻlovlari aeroport daromadining qariyb chorak qismini tashkil etadi. 2025 yilda esa aeroport 10 milliard rubl zarar koʻrgan.

#domodedovo

Putinning doʻsti Domodedovo aeroportiga egalik qiladi