Maʼlum boʻlishicha, hafta davomida Oʻzbekiston hududining katta qismida havo harorati kunduzi +30.. +32 darajagacha koʻtariladi. Juma kuniga kelib, shimolga gʻarbdan yuqori bosimli boshqa sinoptik jarayonning kirib kelishi natijasida, dam olish kunlarining havo harorati hafta boshiga nisbatan biroz pasayadi. Oktabr oyi noodatiy hisoblangan bunday issiqlik muhitida umuman yogʻingarchilik kutilmaydi.

«Oʻzgidromet»prognoziga koʻra, dushanba kuni Oʻzbekiston boʻylab yogʻingarchilik kutilmaydi. Kunduzi togʻlarda +23 daraja, shimoliy hududlar, Fargʻona vodiysi, Samarqand, Sirdaryo, Jizzax va Toshkent vilotlarida +28 daraja, Buxoro va Navoiy viloyatlarida +30 daraja, janubiy viloyatlarda +32 darajagacha issiq harorat, tunda mamlakatning katta qismida +10…+15 daraja, togʻlar va shimoliy hududlarda +5…+10 daraja iliq harorat kutiladi.

Manba: Meteoinfo.ru

Shimoliy va choʻl hududlarida soniyasiga 18 metrgacha kuchayuvchi kuchli shamollar chang boʻronlarini keltirib chiqarishi mumkin.

«Oʻzgidromet» sinoptiklari seshanba-juma kunlari uchun ishlab chiqqan prognozida mazkur kunlari yogʻingarchilik boʻlmasligini, seshanba xuddi dushanba kabi issiq oʻtishi, chorshanba-juma kunlari harorat hafta boshiga nisbatan biroz pasayishi maʼlum qilgan.

Ayrim xorijiy ob-havo prognoz markazlari seshanba kuni Surxondaryo viloyati katta qismida havo harorati +35 darajagacha koʻtarilishi mumkinligini keltirgan. Quyidagi xaritada 14 oktabr kuni soat 14:00 da Surxondaryoda havo harorati +34 darajagacha koʻtarilishi mumkin boʻlgan hududlarni och binafsharang rangda koʻrish mumkin.

Seshanba kuni choʻllarda va shimoliy hududlarda xuddi dushanbadagi kabi chang boʻronlari boʻlishi mumkin. Chorshanba-juma kunlari esa Oʻzbekiston boʻylab havo harorati hafta boshiga nisbatan 1−3 darajagacha pasayishi maʼlum boʻlgan. Juma kuni esa, shimoliy hududlarni hisobga olmasa, boshqa joylarda haroratning sezilarli pasayishi roʻy bermaydi.

Shanba va yakshanba kunlari Oʻzbekistonning shimoliy mintaqalaridan boshqa barcha hududlarida havo harorati deyarli ish kunlaridagi kabi saqlanadi, yogʻingarchilik kutilmaydi. Umuman, dam olish kunlaridagi ob-havo oʻzgarishlari haqida «Oʻzgidromet»ning yaqin kunlarda yangilanadigan ob-havo prognozi axborotidan aniqroq maʼlumot olish mumkin.

«Oʻzgidromet»ning boshqa bir axboroti hamda Yevropa oʻrta va uzoq muddatli ob-havo prognoz markazi (ECMWF)ning prognozlariga koʻra, hafta (13 oktabr — 19 oktabr kunlari) davomida Oʻzbekistonda juda issiq harorat kutiladi. Xususan, mamlakatning yarmidan koʻpida bu hafta shu davrga xos oʻtmish oktabrlaridagi meʼyoriy harorat muhitidan 3−6 daraja yuqori boʻladi.

Yogʻingarchilik kesimida esa hafta yana quruq oʻtishi taʼkidlanyapti, xususan, togʻlarda bu vaziyat yana ham yomonroq kechadi.

Shunday qilib, hafta quruq va issiq oʻtishi oydinlashmoqda. Bu kabi vaziyat qishloq xoʻjalik tarmoqlari uchun ayni ijobiy holatni taqdim etib, bogʻbon-u dehqonlar dala va bogʻlardagi kuzgi hosilni nobud qilmay yigʻib-terib olishlarini kafolatlasa-da, ammo kunduzgi vaqtlardagi oktabr oʻrtalariga xos boʻlmagan issiq harorat ob-havo oʻzgarishlariga moil kishilar salomatligiga sezilarli taʼsir etadi.

#haftalik ob-havo

Surxondaryoga yoz qaytmoqda: Oʻzbekistonda haftalik ob-havo