Bu haqda Prezident matbuot kotibi Sherzod Asadov maʼlum qildi.

Shu bilan birga, Komil Allamjonov Oʻzbekiston Respublikasi Prezidenti administratsiyasi rahbarining maslahatchisi sifatidagi faoliyatini ham davom ettiradi.

Bundan avval Jorj Vashington universiteti huzuridagi Yevropa, Rossiya va Yevroosiyo tadqiqotlari instituti (IERES)ning Markaziy Osiyo dasturi (CAP) janob Komil Allamjonovning mazkur dasturning maxsus maslahatchisi etib tayinlanganini eʼlon qilgan edi.

Oʻzbekiston prezidenti administratsiyasining AQShdagi vakili lavozimi

Tashqi siyosiy va davlat tashabbuslarini muvofiqlashtirish samaradorligini oshirish maqsadida 2026 yil 1 yanvardan Oʻzbekistonning AQShdagi elchixonasi tuzilmasiga qoʻshimcha maslahatchi-elchi — Prezident administratsiyasining AQShdagi vakili lavozimi kiritilishi haqida xabar berilgan edi. Prezidentning 12 noyabrdagi farmoniga koʻra, maslahatchi-elchini tayinlash va lavozimdan ozod etish, shuningdek uning faoliyati reglamentini tasdiqlash Prezident administratsiyasi rahbari tomonidan amalga oshiriladi.

Maslahatchi-elchi oʻz faoliyatida Prezident administratsiyasi rahbariga hisobdor va Oʻzbekistonning AQShdagi diplomatik vakolatxonasi rahbari faoliyatini ikki tomonlama munosabatlarni rivojlantirish yoʻnalishida qoʻllab-quvvatlashga masʼul hisoblanadi.

Maslahatchi-elchi zimmasiga quyidagi vazifalar yuklatiladi:

Oʻzbekiston va AQShda yirik va strategik investitsiya hamda savdo loyihalarini amalga oshirish masalalari boʻyicha bevosita tashabbus koʻrsatish va muhokama olib borish;
Oʻzbekiston tomonidan Amerika—Oʻzbekiston ishbilarmonlik va investitsiya kengashi ishini kompleks muvofiqlashtirish.

Farmonga koʻra, Tashqi ishlar vazirligi Investitsiyalar, sanoat va savdo vazirligi bilan birgalikda uch hafta muddatda Oʻzbekistonning AQShdagi elchixonasi xodimlari shtat birligini koʻpaytirish toʻgʻrisida taklif kiritishi lozim.

Bir oy muddatda AQSh hududida qoʻshimcha konsulxonalar ochish masalasi ishlab chiqiladi. Bunda geografik qamrovni taʼminlash maqsadida AQShning asosiy transport va iqtisodiy markazlari, shuningdek vatandoshlar diasporasi koʻp joylashgan hududlar (Filadelfiya, Chikago, Orlando va Sietl shaharlari) inobatga olinadi.

Shuningdek, AQShning barcha shtatlarida yashayotgan oʻzbek diasporalari bilan samarali hamkorlik modelini ishlab chiqish va uni muvaffaqiyatli amalga oshirish — AQShda yangidan tashkil etilayotgan konsulxonalarning asosiy vazifalaridan biri etib belgilab qoʻyilgan.

#komil allamjanov

Komil Allamjonov Prezident administratsiyasining AQShdagi vakili etib tayinlandi