Jinoyat kodeksiga yangi boʻlim kiritiladi

Hujjatga koʻra, Jinoyat kodeksiga «Aholi salomatligi va millat genofondiga qarshi jinoyatlar» nomli yangi boʻlim kiritiladi. Unga muvofiq, aholi salomatligiga tahdid soluvchi narkojinoyatlar uchun javobgarlik kuchaytiriladi.

Shu jumladan, quyidagi qilmishlar uchun 20 yilgacha ozodlikdan mahrum etish jazosi belgilanadi:

narkojinoiy uyushma tashkil etish va uning faoliyatini taʼminlash;
giyohvandlik vositalarini uyushgan guruh tomonidan transchegaraviy yoki internet orqali oʻtkazish;
hokimiyat vakolatlarini suiisteʼmol qilib narkojinoyatlarga homiylik qilish;
gʻayriqonuniy narkolaboratoriya tashkil etish.

Maʼmuriy javobgarlik kuchaydi

Farmonga muvofiq, giyohvandlik vositalarini jamoat joylarida isteʼmol qilganlik uchun 15 sutkagacha maʼmuriy qamoq jazosi joriy etiladi. Bu aholining sogʻlom turmush tarzini taʼminlashga va jamoat xavfsizligini mustahkamlashga qaratilgan chora hisoblanadi.

Jinoyat uchun jazo ikki baravargacha ogʻirlashtiriladi

Narkojinoyatlarning sodir etilishi va qayta sodir etilishining oldini olish maqsadida qator qilmishlar uchun jinoiy javobgarlik ikki baravargacha ogʻirlashtiriladi. Ular qatorida:

giyohvandlik vositalarini koʻp miqdorda tayyorlash, saqlash, tashish yoki tarqatish;
kuchli taʼsir qiluvchi moddalarni koʻp miqdorda va takroran muomalaga kiritish;
odam oʻlimiga sabab boʻlgan holatlarda narkomaniyaga jalb etish.

Yoshlarni himoya qilish choralari

Farmonda voyaga yetmaganlar va yoshlarni narkojinoyatlardan himoya qilishga doir qoʻshimcha qoidalar ham belgilandi.

Endilikda:

voyaga yetmagan shaxslarga nisbatan yoki ular ishtirokida sodir etilgan narkojinoyatlar ogʻirlashtiruvchi holat sifatida baholanadi;
taʼlim muassasalari yoki bolalar dam olish oromgohlarida giyohvand moddalarni tarqatish uchun javobgarlik ikki baravargacha ogʻirlashtiriladi.

Bundan tashqari, ayrim narkojinoyatlarni sodir etgan shaxslar jazoni muddatidan oldin shartli ravishda ozod qilish huquqidan mahrum etiladi.

#narkojinoyat

Aholi salomatligi narkojinoyatlardan himoya qilinadi