Ekologiya, atrof-muhitni muhofaza qilish va iqlim oʻzgarishi vazirligi tasarrufidagi Orolboʻyi milliy tabiat bogʻi hududida har yili hayvonot va qushlar dunyosining koʻpayib bormoqda.

Hozirgi kunda Orolboʻyi milliy tabiat bogʻida uchraydigan qushlar soni 116 turni, sut emizuvchilar 17 turni, sudralib yuruvchilar esa 15 turni tashkil etmoqda. Bu bogʻ hududining ekologik ahamiyati ortib, bioxilma-xillik tiklanayotganligini yaqqol koʻrsatib turibdi.

Bogʻ hududida faoliyat yuritayotgan inspektorlar va ilmiy xodimlarning muntazam patrul nazorati, monitoring ishlari va profilaktik chora-tadbirlari yovvoyi hayvonlarning osoyishta yashashini taʼminlamoqda.

Ayniqsa, qish mavsumida yovvoyi hayvon va qushlar uchun qulay sharoit yaratish maqsadida turli biotexnik tadbirlar amalga oshirilmoqda. Bunga ozuqa stansiyalari oʻrnatish, sunʼiy uya va panoh boʻladigan joylar barpo etish, suv manbalarini tozalash va qoʻshimcha oziqlantirish ishlarini misol qilib keltirish mumkin. Ushbu saʼy-harakatlar yovvoyi fauna vakillarining qattiq qishdan talafotsiz oʻtishini taʼminlab, ularning tabiiy koʻpayishiga zamin yaratmoqda.

Mazkur chora-tadbirlar natijasida Orolboʻyi milliy tabiat bogʻi tabiiy boyliklarimizni asrab-avaylash, noyob va yoʻqolib borayotgan turlarni saqlab qolish borasida muhim maydonlardan biri boʻlib, bu kabi ijobiy natijalar bogʻ xodimlari va mutasaddi tashkilotlar oʻrtasidagi hamkorlikning hamda zamonaviy yondashuvlarning mahsuli hisoblanadi.

#orol

Orolboʻyida hayvonot va qushlar dunyosi koʻpaymoqda