Ekologiya, atrof-muhitni muhofaza qilish va iqlim oʻzgarishi vazirligi 2024 yilda Surxondaryo viloyatidagi ov qonunchilikda belgilangan tartibda, tegishli toʻlov evaziga ruxsatnoma asosida amalga oshirilganligini maʼlum qildi.

Oʻzbekiston Respublikasining “Ov qilish va ovchilik xoʻjaligi toʻgʻrisida”gi Qonuniga koʻra, Qizil kitobga kiritilgan yovvoyi hayvonlar soni Fanlar akademiyasi mutaxassislari tomonidan doimiy hisoblab boriladi va ularning xulosasiga asosan populyatsiyaga taʼsir qilmaydigan miqdorda ovlash uchun ruxsat beriladi. Buning uchun belgilangan tartibda toʻlov undiriladi.

Xususan, 2024 yilda morxoʻrlarni ovlash uchun oʻrnatilgan tartibda ruxsat berilgan va 100 000 AQSh dollari miqdorida toʻlov undirilgan. Bu mablagʻlar tabiatni muhofaza qilish, xususan, brakonerlikka qarshi samarali kurash olib borishga yoʻnaltirilgan.

Taʼkidlash joizki, “Ov qilish va ovchilik xoʻjaligi toʻgʻrisida”gi Qonunga koʻra, har yili yovvoyi hayvonlarni tutish uchun kvota belgilanadi. Bunda yovvoyi hayvonlarning eng yoshi kattasi, nasl qoldirish davridan oʻtgan erkagini ovlashga ruxsat beriladi va jarayon qatʼiy nazorat ostida amalga oshiriladi.

Maʼlumot uchun, xorijiy davlatlarda ham aynan shunday tartib joriy qilingan. Xususan, Namibiyada oʻlja ovi yiliga 3 mln dollardan koʻp foyda keltiradi. Bundan tashqari, ochiq maʼlumotlarga koʻra, har yili Tojikistonda 10–16 bosh morxoʻr, 100–115 bosh arxar, Moʻgʻulistonda esa 90–100 bosh arxar, 50–60 boshgacha xongul ovlashga ruxsatnomalar berilmoqda.

#ov

Rossiyalik ovchi nima asosga koʻra Surxondaryoda Qizil kitobga kiritilgan morxoʻrni ovladi? Ekologiya vazirligi javob berdi