18 sentabr kuni jinoyat ishlari boʻyicha Ohangaron shahar sudi Oʻzbekiston prezidentini haqorat qilgan fuqaroga nisbatan sud hukmi oʻqildi, deya xabar bermoqda hukmni oʻrganib chiqqan Gazeta.

Sud hujjatida taʼkidlanishicha, Ohangaron shahrida yashovchi 18 yoshli sudlanuvchi oʻziga tegishli Instagram profili orqali Oʻzbekistonning birinchi va amaldagi prezidentlari tasvirlangan fotosurat ostida Shavkat Mirziyoyevga nisbatan haqoratomuz mazmundagi izoh qoldirgan.

Sud-siyosatshunoslik lingvistik ekspertizasi xulosasiga koʻra, izohda prezidentga qarshi qaratilgan, uning shaʼni va qadr-qimmatini kamsituvchi, obroʻsizlantiruvchi fikrlar, gʻoyalar va soʻzlar mavjudligi aniqlangan.

Nima uchun bunday izoh qoldirgani va maqsadi nima boʻlgani haqidagi savolga sudlanuvchi hech qanday maqsad boʻlmagani, izohni oʻylamasdan yozganini aytdi.

U aybiga toʻliq iqrorlik bildirdi.

Sud ayblanuvchini Jinoyat kodeksining 158-moddasining 3-qismi (Oʻzbekiston prezidentini internetdan foydalangan holda haqoratlash yoki unga tuhmat qilish) bilan aybli deb topib, unga nisbatan 2 yil muddatga ozodlikni cheklash jazosi tayinladi.

Shuningdek, uning zimmasiga quyidagi qoʻshimcha cheklovlar yuklatildi:

Alkogolli ichimliklar isteʼmol qiladigan va koʻngilochar joylar (kafe, bar, restoranlar)ga bormaslik;
ommaviy tadbirlar (namoyishlar, mitinglar)da ishtirok etmaslik;
jinoyat sodir etishga moyil boʻlgan shaxslar bilan aloqa oʻrnatmaslik;
mahkumlarni nazorat qiluvchi organning roziligisiz, yashash joyini oʻzgartirmaslik hamda Toshkent viloyat hududidan tashqariga chiqmaslik.

Maʼlumot uchun, 2021 yildagi oʻzgartishlarga koʻra, Internetdagi biror blog, ijtimoiy tarmoqdagi shaxsiy sahifa yoki biror bir xabar ostidagi izohda prezidentga haqorat yoki tuhmatni ifoda etadigan maʼlumotni aks ettirish (matn, surat, audio, video kabi shakllarda) toʻgʻridan-toʻgʻri jinoiy javobgarlikka tortishga sabab boʻladi.

Endilikda kodeksning 158-moddasi 3-qismiga asosan, Oʻzbekiston Respublikasi prezidentini internetda haqoratlash yoki unga tuhmat qilish:

3 yilgacha axloq tuzatish ishlari yoki –
2 yildan 5 yilgacha ozodlikni cheklash yoxud –
5 yilgacha ozodlikdan mahrum qilish bilan jazolanadi.

#prezidentni haqorat qilish

Instagram’da prezidentni haqorat qilgan yigitga hukm oʻqildi