Unga koʻra, Ixtisoslashtirilgan taʼlim muassasalari agentligi huzurida davlat muassasasi shaklida Fan olimpiadalari markazi tashkil etiladi. Qobiliyatli hamda fanlarni chuqur oʻrganishga qiziqadigan yoshlarni aniqlash va seleksiya qilish, ulardagi iqtidorni yanada rivojlantirish uchun zarur shart-sharoitlar yaratish markazning asosiy faoliyat yoʻnalishlaridan biri etib belgilangan. 2025 yilda markaz tomonidan:

— 5–8-sinf oʻquvchilari oʻrtasida olimpiadalarda yuqori natijalarni qayd etgan iqtidorli oʻquvchilar bazasi shakllantiriladi va ularni xalqaro olimpiadalarga maqsadli tayyorlash yoʻlga qoʻyiladi;

— har bir fan yoʻnalishi boʻyicha oʻquv dasturlari, adabiyotlar, metodik tavsiyalar, qoʻllanmalar va jurnallar yaratilib boriladi;

— oʻquvchilarni fan olimpiadalariga tayyorlovchi trener-oʻqituvchilarning uzluksiz kasbiy rivojlanishi uchun zarur sharoitlar yaratiladi, ularga yangi metodikalar oʻrgatib boriladi;

— fan olimpiadalari boʻyicha milliy terma jamoalarning xorijiy davlatlar terma jamoalari bilan qoʻshma yigʻinlar oʻtkazish amaliyoti yoʻlga qoʻyiladi;

— oʻquvchilar uchun xalqaro olimpiadalarda ruhiy bosimni yengish boʻyicha seminarlar hamda motivatsion treninglar tashkil qilinadi;

— iqtidorli yoshlar uchun “intellektual oromgohlar” tashkil etiladi.

2025 yil 1 yanvardan esa markaz tomonidan quyidagilar joriy qilinishi kutilmoqda:

— nufuzli xalqaro olimpiadalarda ishtirok etadigan terma jamoalar rahbarlarini jamoaning natijasiga qarab ragʻbatlantirish tartibi joriy etiladi;

— asosiy fan olimpiadalarining hududiy va respublika bosqichlarida hamda xalqaro olimpiadalarda gʻoliblikni qoʻlga kiritgan oʻquvchilar, ularning oʻqituvchilari va terma jamoalar rahbarlariga toʻlanadigan pul mukofotlari va beriladigan sovgʻalar daromad soligʻidan ozod etiladi.

Shuningdek, qarorda 2025 yil 1 dekabrgacha xalqaro va mahalliy fan olimpiadalari natijalarining doimiy statistikasini yuritish, onlayn fan olimpiadalarini tashkil qilish va oʻtkazish hamda olimpiadalar ishtirokchilarining maʼlumotlar bazasini shakllantirish imkonini beruvchi elektron platforma yaratilish ham belgilangan.

Bundan tashqari, Oʻzbekistonda oʻtkaziladigan buyuk allomalar nomi bilan ataladigan xalqaro fan olimpiadalari toʻgʻrisidagi maʼlumotlar joylashtiriladigan, mahalliy va xorijiy oʻquvchilarning ushbu olimpiadalarda ishtirok etish uchun roʻyxatdan oʻtishlarini taʼminlaydigan maxsus sayt ishga tushiriladi.

#qaror

Fan olimpiadalari markazi tashkil etiladi. Uning vazifasi nimalardan iborat?