Yoʻl harakati xavfsizligini taʼminlash sohasi raqamlashtiriladi

Oʻzbekistonda yoʻl harakati xavfsizligini taʼminlash sohasini raqamlashtirish boʻyicha qoʻshimcha chora-tadbirlar belgilandi. Bu haqda “Yoʻl harakati xavfsizligini taʼminlash sohasini raqamlashtirish boʻyicha qoʻshimcha chora-tadbirlar toʻgʻrisida”gi Hukumat qarori (11-son, 2026 yil 20 yanvar) qabul qilindi.

Qarorga muvofiq, Jamoat xavfsizligi departamenti Yoʻl harakati xavfsizligi xizmati axborot tizimining “Ma’muriy amaliyot” moduli masʼul vazirlik va idoralarning axborot tizimlari bilan integratsiya qilinadi.

2026 yil 1 fevraldan boshlab:

• umumiy vazni (yuk bilan) 44 tonnadan ortiq boʻlgan yuk avtomobillari,
• kon, shaxta va karerlarda qoʻllaniladigan maxsus transport vositalari,
• yuridik shaxslarga tegishli yoʻnalishsiz taksilar,
• shuningdek, “antikvar” avtomototransport vositalari uchun alohida seriyali roʻyxatdan oʻtkazish davlat raqami belgilari joriy etiladi.

Shuningdek, ishlab chiqarilganiga 50 yil va undan ortiq boʻlgan transport vositalaridan foydalanish hamda ularni qayta roʻyxatdan oʻtkazish taqiqlanadi. Bunday transport vositalari davlat roʻyxatidan chiqariladi.

Qabul qilingan qaror yoʻl harakati xavfsizligini oshirish, maʼmuriy jarayonlarni raqamlashtirish va transport sohasida samaradorlikni taʼminlashga qaratilgan.