Toshkent metropolitenida yoʻlovchilar xavfsizligiga tahdid soluvchi holat qayd etildi. Metropoliten matbuot xizmati xabar berishicha, bir yoʻlovchining qoidabuzar harakati oqibatida poyezd vagonlari eshiklari ishdan chiqqan.

Maʼlum qilinishicha, 16 dekabr kuni soat 16:23 da “Mustaqillik maydoni” bekatidan “Paxtakor” bekati tomon yoʻl olishi kerak boʻlgan 16-sonli harakat tarkibi yoʻlovchilarni qabul qilib, eshiklarini yopayotgan vaqtda yoʻlovchilardan biri vagonga kirish maqsadida eshikni kuch bilan ochishga uringan.

Natijada eshikni himoya qiluvchi mexanizm ishdan chiqqan. Mashinist tomonidan nosozlik vaqtincha bartaraf etilganiga qaramasdan, keyingi bekatga yetib bormasdan yana takrorlangan. Shundan soʻng yoʻriqnomaga muvofiq, barcha yoʻlovchilar bekatga tushirilib, harakat tarkibi elektrodepoga olib ketilgan.

“Toshkent metropoliteni” DUK yoʻlovchilarga murojaat qilib, metro obʼektlarida xavfsizlik talablariga qatʼiy rioya qilish va davlat mulkiga ziyon yetkazmaslikka chaqirdi.

“Birgina eʼtiborsizlik ham siz va boshqa yoʻlovchilar hayoti uchun xavf tugʻdirishi mumkin”, — deyiladi rasmiy ogohlantirishda.

Shuningdek, metropoliten rahbariyati metroda harakatlanish qoidalarini yana bir bor eslatdi:

bekatga yaqinlashganda vagondan tushish uchun eshiklarga oldindan yaqinlashing;
vagondan chiqayotgan yoʻlovchilarga avval yoʻl bering;
yoʻlovchilar toʻliq tushib boʻlgach, vagonga chiqing;
vagonga kirgach, eshik oldida toʻxtab qolmang, vagon oʻrtasiga harakatlaning;
metro vagonlari eshiklariga suyanmang;
bekat va yoʻlaklarda harakatlanishda “oʻng qoʻl” qoidasiga amal qiling.

Qayd etilishicha, mazkur qoidalarga rioya qilish barcha yoʻlovchilarning xavfsizligi va qulay harakatlanishini taʼminlaydi.

#qoidabuzarlik

Toshkent metrosida bir yoʻlovchi sabab vagondagi barcha yoʻlovchilar tushirildi