50 yoshli sobiq Angliya terma jamoasi sardori bu sharafli unvonni ilk bor futboldagi xizmatlari uchun berilgan mukofotdan 20 yil oʻtgach oldi.

Bekxem marosimga moda dizayneri va sobiq Spice Girls guruhi aʼzosi boʻlgan rafiqasi Viktoriya Bekxem tikib bergan kostyumda qatnashdi.

«Bu bizning oilamiz uchun katta va unutilmas on. Men Londonning sharqidagi oddiy muhitda oʻsganman, futbolchi boʻlishni orzu qilganman, endi esa qirol oldida Vindzor qasrida turibman. Bundan ortiq baxt boʻlmaydi», — dedi Bekxem marosimdan keyin.

Oddiy bolalikdan dunyo miqyosidagi yulduzlikkacha

Devid Bekxem Londonning sharqida tugʻilgan va 1995 yilda «Manchester Yunayted» tarkibida Premer-ligada debyut qilgan. U jamoa bilan olti marta Angliya chempioni boʻlgan, ikki marta Kubok, va bir marta Chempionlar ligasini yutgan. Keyinchalik u Real Madrid, Los-Andjeles Gelaksi, Milan va Pari Sen-Jermen klublarida oʻynadi.
U 2013 yilda sport karerasini yakunlab, Angliya termasi safida 115 oʻyin oʻtkazgan.

Bekxem oʻzining aniq jarima zarbalari va aʼlo uzatmalari bilan tanilgan. Shu bilan birga, u oʻz davrining eng tijorat jihatdan muvaffaqiyatli sportchilaridan biri boʻlgan. U Adidas, Armani, H&M va Pepsi bilan hamkorlik qilgan hamda 2005 yildan beri YuNISEFning yaxshi niyat elchisi hisoblanadi.
Sunday Times Rich List 2025 maʼlumotlariga koʻra, Bekxemlar oilasining umumiy boyligi 500 million funtga teng.

Qirollik oilasiga boʻlgan hurmat

Bekxem oʻzini «qatʼiy monarxiya tarafdori» deb ataydi. 2022 yilda u marhuma qirolicha Yelizaveta II xotirasini yod etish uchun Vestminster zalidagi navbatda 12 soatdan ortiq vaqt turib, shohona taklifdan — navbatni chetlab oʻtish imkoniyatidan — voz kechgan.
U Prins Uilyam va Keyt Middltonning 2011 yildagi toʻyida hamda Prins Garri va Megan Marklning 2018 yildagi toʻyida qatnashgan.

Qirol Charlz bilan uni bogʻlab turadigan yana bir jihat — bogʻdorchilikka boʻlgan qiziqish. 2024 yilda Bekxem The King’s Foundation tashkilotining elchisi etib tayinlangan. Bu fond taʼlim va barqaror rivojlanish yoʻnalishlarini qoʻllab-quvvatlaydi.

Oila va maydondan keyingi hayot

Bekxem 1999 yilda Spice Girls guruhi aʼzosi Viktoriya Adamsga uylangan. Ular toʻrt nafar farzand tarbiyalamoqda. Ularning hayoti va shon-sharaf bosimi haqida Netflix hujjatli serialida bayon etilgan.

Bekxem oʻz oilasini “hayotimdagi eng katta yutugʻim” deb biladi.

#rыsar

Devid Bekxem sport va xayriyadagi xizmatlari uchun rыsarlik unvoni bilan taqdirlandi