Toshkentda Jahon banki, IT Park va Oʻzbekiston Nogironlar jamiyati Markaziy kengashi koʻmagida amalga oshirilayotgan “Uzbekistan Digital Inclusion” tashabbusi doirasida oʻquv kursi boshlandi.

Dastur nogironligi boʻlgan yoshlar uchun moʻljallangan boʻlib, unda rezyume tuzish, suhbatga tayyorgarlik koʻris hamda mehnat huquqlari bilan tanishish boʻyicha amaliy mashgʻulotlar oʻtkaziladi.

Mazkur oʻquv dasturi aholining ijtimoiy himoyaga muhtoj qatlamlarini raqamli iqtisodiyotga integratsiya qilish va IT-xizmatlar sohasida yangi ish oʻrinlarini yaratishga qaratilgan keng qamrovli strategiyaning birinchi bosqichi hisoblanadi.

Keyinchalik tashabbus mamlakatning toʻqqizta hududini qamrab oladi hamda unda 18 yoshdan 30 yoshgacha boʻlgan kamida 450 nafar ishtirokchini jalb etishni, shundan kamida 50 foizini ayollar tashkil etishini nazarda tutadi.

Loyiha “Raqamli Oʻzbekiston – 2030” va “2022–2026-yillarga moʻljallangan Yangi Oʻzbekistonning taraqqiyot strategiyasi” maqsadlariga toʻliq mos keladi va raqamli transformatsiya ijtimoiy adolat va iqtisodiy imkoniyatlarni kengaytirish vositasi boʻlib xizmat qilishi mumkinligini yaqqol namoyon etadi.

#taʼlim

Toshkentda nogironligi boʻlgan shaxslar uchun taʼlim dasturi ishga tushirildi