2026 yil 3 mart kuni IIV huzuridagi Jazoni ijro etish departamenti, Oʻzbekiston Respublikasi Oliy Majlisining Inson huquqlari boʻyicha vakili (Ombudsman), Sogʻliqni saqlash vazirligi hamda Oʻzbekiston “Adolat” sotsial-demokratik partiyasi hamkorligida 21-sonli jazoni ijro etish koloniyasida jazo muddatini oʻtayotgan mahkumalar uchun keng qamrovli tibbiy koʻrik tashkil etildi.

Tadbir “Inson qadri – oliy neʼmat” va “Sogʻlom ayol – sogʻlom millat tayanchi” tamoyillari asosida oʻtkazilib, unda inson salomatligi va huquqlarini taʼminlash ustuvor vazifa sifatida belgilandi.

Tor doiradagi mutaxassislar jalb etildi

Tibbiy koʻrikka Sogʻliqni saqlash vazirligining akusher-ginekolog, onkoginekolog, mammolog, kardiolog, endokrinolog, pediatr, psixiatr kabi 10 nafarga yaqin tor mutaxassis shifokorlar guruhi jalb etildi.

Shuningdek, koʻrik davomida rentgen, UTT va qon tahlillarini oʻtkazish uchun zarur tibbiy jihozlar bilan taʼminlangan maxsus avtobuslar olib kelindi.

Mutaxassislar ishtirokida mahkuma ayollar hamda ularning uch yoshgacha boʻlgan farzandlari toʻliq tibbiy koʻrikdan oʻtkazildi.

Salomatlikni mustahkamlashga qaratilgan choralar

Bunday tadbirlar mahkuma ayollarning salomatligini mustahkamlash, kasalliklarni erta aniqlash va oʻz vaqtida davolash choralarini koʻrish imkonini beradi.

Qayd etilishicha, mamlakatda jazoni ijro etish tizimini insonparvarlik tamoyillari asosida isloh qilish, mahkumlarning huquq va qonuniy manfaatlarini himoya qilish borasida izchil chora-tadbirlar amalga oshirilmoqda.

Qonunchilikdagi yangiliklar

Xususan, 2023 yilda Jinoyat va Jinoyat-ijroiya kodekslariga kiritilgan oʻzgartishlar bilan jazoni yengilrogʻi bilan almashtirish, muddatidan ilgari shartli ozod etish hamda manzil-koloniyalarga oʻtkazish mexanizmlari qayta koʻrib chiqildi. Shuningdek, mahkumlarni foto va videotasvirga olish faqat ularning yozma roziligi asosida amalga oshirilishi belgilanib, shaxsiy daxlsizlik kafolatlari mustahkamlandi.

2024 yilda qabul qilingan qonun bilan mahkumlarning insoniy muomalada boʻlinishi, shaʼni va qadr-qimmati hurmat qilinishi hamda Ombudsmanga murojaat qilish huquqi yanada mustahkamlandi. Shu bilan birga, ogʻir va oʻta ogʻir jinoyatlar uchun jazo oʻtayotgan shaxslarning saylov va referendumlarda ishtirok etish huquqi belgilandi.

2025 yildan eʼtiboran mahkumlarni maʼnaviy-axloqiy jihatdan ragʻbatlantirishga qaratilgan yangi mexanizm joriy etildi. Unga koʻra, tasdiqlangan adabiyotlar roʻyxatidagi kitoblarni mutolaa qilgan mahkumlarning jazo muddati sud qarori asosida qisqartirilishi mumkin. Bu norma mahkumlarning tuzalish yoʻliga oʻtishini ragʻbatlantirishga qaratilgan.

Bundan tashqari, jazoni ijro etish muassasalarida mahkumlarga masofaviy videouchrashuvlardan foydalanish huquqi berildi. Bu esa ularning oilaviy aloqalarini saqlab qolish va ijtimoiylashuv jarayonini qoʻllab-quvvatlashga xizmat qilmoqda.

Sharoitlar oʻrganildi

Tashrif doirasida koloniyadagi yashash va ovqatlanish sharoitlari, bolalar uyi, psixolog bilan ishlash xonasi hamda kutubxona koʻzdan kechirildi. Mahkumalar bilan yakka tartibda va jamoaviy suhbatlar oʻtkazilib, ularning murojaatlari nazoratga olindi.

#tibbiy koʻrik

Ayollar koloniyasidagi mahkumalar chuqurlashtirilgan tibbiy koʻrikdan oʻtkazildi