Vazirlik maʼlum qilishicha, Mehnat kodeksining 252-moddasiga (ragʻbatlantiruvchi xususiyatga ega toʻlovlar) muvofiq, mukofotlar va boshqa ragʻbatlantiruvchi toʻlovlarni berish tartibi ish beruvchi tomonidan belgilanadi hamda jamoa shartnomasi yoki ichki hujjatlar bilan rasmiylashtiriladi.

«Agar ichki hujjatlarda barcha xodimlarga bayram munosabati bilan mukofot berish majburiyati belgilangan boʻlsa, ish beruvchi uni berishga majbur. Aks holda, bu qarzdorlikka olib keladi. Agar bunday majburiyat nazarda tutilmagan boʻlsa, mukofot berish majburiy emas va ixtiyoriy hisoblanadi», — deyiladi vazirlik xabarida.

Shuningdek, taʼkidlanishicha, mukofotlash jarayonida kamsitishga yoʻl qoʻyilmasligi lozim. Mehnat kodeksining 4-moddasiga (mehnat huquqlarining tengligi va mehnat sohasida kamsitishni taqiqlash) koʻra, jins, yosh, lavozim yoki mehnat natijalariga bogʻliq boʻlmagan boshqa belgilar asosida farq qoʻyish kamsitish hisoblanadi.

Qonunchilikka muvofiq, bayram mukofotini bayramdan oldin ham, keyin ham berish mumkin — aniq muddat belgilanmagan. Byudjet tashkilotlarida esa mukofotlash tartibi faqat qonun hujjatlarida nazarda tutilgan hollarda amalga oshiriladi.

#yangi yil sovgʻasi

Xodimlarga Yangi yil mukofoti berilishi shartmi?