Yangi yil arafasida firibgarlar faollashdi: bitta havola orqali bank kartangizdan ayrilishingiz mumkin

Ushbu havolalarni ochgan foydalanuvchilarning bank kartalari va shaxsiy maʼlumotlari firibgarlar qoʻliga oʻtib ketishi mumkin. Bu haqda rasmiy manbalar ham ogohlantirmoqda.

Mutaxassislar taʼkidlashicha, zamonaviy kiberfiribgarlik usullari inson his-tuygʻulari bilan manipulyatsiya qilishga asoslangan. Endi gap oddiy .apk yoki .exe fayllar haqida emas. Firibgarlar interaktiv tabrikka oʻxshash havolalar yuborib, foydalanuvchini fishing saytga yoʻnaltiradi. Ayrim hollarda “ochilmayapti” degan bahona bilan goʻyoki GIF yoki video koʻrinishidagi fayl yuborilib, uni koʻrish uchun “yangilash” (obnovleniye) taklif qilinadi.

Shuningdek, “yetkazib berish xizmati” nomidan yuborilgan xabarlar orqali “yangi yil sovgʻasini olish” uchun ilovalar yoki “yuk xati”ni yuklab olish talab qilinayotgan holatlar ham koʻpaygan. Bunday fayllar orqali qurilmaga zararli dastur oʻrnatiladi.

Firibgarlik qurboni boʻlmaslik uchun nimalarga eʼtibor berish kerak?

Kiberxavfsizlik mutaxassislari quyidagi tavsiyalarni beradi:

— Har doim xabar manbasini tekshiring. Yuboruvchi sizga tanish boʻlmasa, havola yoki faylni ochmang.
— Fayl formatlariga diqqat qiling. Rasm yoki video sifatida niqoblangan fayllar ham xavfli boʻlishi mumkin. Xavfsiz formatlar: .jpg, .png, .gif, .mp4, .webm. Nomaʼlum va ishonchsiz formatlardan saqlaning.
— Internetda arzon narxda yangi yil sovgʻalari, oziq-ovqat yoki archa sotilishi haqidagi eʼlonlarga ishonib, oldindan toʻlov qilmang. Koʻp hollarda firibgarlar pulni olgach, akkauntni oʻchirib yoʻqolib qoladi.

Bayramona kayfiyatda hushyorlikni yoʻqotmaslik — shaxsiy moliyaviy xavfsizlikni saqlashning eng muhim sharti hisoblanadi.