"Андижон" клуби футболчиси Миллий гвардия ходими билан муштлашди

Унда айтилишича, жорий йилнинг 11 август куни Чилонзор туманида жойлашган "Бунёдкор" стадионида "Бунёдкор-Андижон" жамоалари ўртасида футбол учрашуви бўлиб ўтган. Андижон футбол клуби аъзоси Марлен Чабанов стадионнинг VIP бўлимида ўйинни томоша қилган. 

Учрашув якунланганидан сўнг, соат 22:05 да футболчи VIP бўлими орқали ичкарига киришга уринган. Махсус рухсатномага (бейджик) эга бўлмаган фуқародан Миллий гвардия ҳарбий хизматчиси унинг қаерга кетаётганлигини, чиқиш учун бошқа йўлакдан фойдаланиши зарурлигини айтган. 

"Аммо фуқаро Марлен Чабанов ҳарбий хизматчининг қонуний талабларига бўйсунмасдан, хизмат фаолиятига қаршилик кўрсатиб, унинг юз қисмига қўли билан бир маротаба уриб, тан жароҳати етказди", 

дейилади хабарда. 

Ҳозирда мазкур ҳолат юзасидан Чилонзор тумани прокуратураси томонидан Ўзбекистон Республикаси Жиноят кодексининг 219-моддаси 2-қисми билан жиноят иши қўзғатилиб, дастлабки тергов ҳаракатлари олиб борилмоқда.

Маълумот учун, футболчи Марлен Чабанов 2000 йил 10 октябрь куни Украинада туғилган. У ёшлигидан футбол билан шуғулланиб, турли жамоаларда тўп сурган. Чобанов 2020 йилнинг иккинчи ярмидан "Пахтакор" билан бирга машқ қилишни бошлаган. 2021 йил январь ойида Чобановнинг Украина клуби билан шартномаси тугаганидан сўнг, "Пахтакор" билан икки йиллик шартнома тузган. Чобановнинг клубдаги йиллик маоши 482 млн 8 юз минг сўм (44,8 минг АҚШ доллари)ни ташкил этган.