Бешёғоч машмашаси: "Снос"га тушган ернинг эгаси ким?

Бундан бир неча ҳафта олдин ижтимоий тармоқларда Тошкент шаҳар Чилонзор тумани "Бешёғоч" маҳалласининг биноси бузиб ташланиб, ўрнига янги меҳмонхона қурилаётгани ҳақидаги хабарлар тарқалган эди. Мазкур ҳолатга расмийлар эътибор қаратмаганидан кейин маҳалла фаоллари томонидан туман судига мурожаат қилинди. 

Аввалроқ хабар берганимиздек, илк суд жорий йилнинг 19 февраль куни уч аризачи, Тошкент шаҳри ва Чилонзор туман ҳокимлиги юристлари билан бирга бир гуруҳ тингловчилар иштирокида бўлиб ўтганди. Унда тарафлар тингланиб, суд маълум муддатга қолдирилди. 

Бугун, 26 февраль куни эса суднинг иккинчи мажлиси бўлиб ўтди. Чилонзор туман судьяси Султонов бошчилигидаги судда тўрт нафар аризачи, Тошкент шаҳри, Чилонзор туман ҳокимлиги юристлари, туман прокурори ва бир гуруҳ тингловчилар қатнашди. 

Аниқ тўхтамга келиш учун батафсил ҳужжатлар талаб қилингани боис суд 7 март кунига қолдирилди. Кейинги суд жараёнида юқорида санаб ўтилган шахслардан ташқари, Маданий мерос, Кадастр агентлигидан мутахассислар, "Бешёғоч" МФЙ ҳамда қурувчи ташкилот "One Housing Group"дан расмий вакиллар иштирок этиши кутилмоқда. 

Судга даъво киритган аризачилардан бири Жавлон Маҳмудовнинг айтишича, бу галги суд жараёнида фуқаролардан яширилган Тошкент шаҳар ҳамда Чилонзор туман ҳокимларининг қарорлари очиқланилган.

"Бугун шаҳар ҳокими билан туман ҳокимининг қарорларини ўрганишга рухсат беришди, лекин нусха олишга қўйишмади. Буни ноқонуний деб ҳисоблаймиз. Нимага десангиз, бунақа ишларда ҳокимнинг қарори ҳам, президентнинг қарори ҳам очиқ бўлиши керак. Бу давлат сири эмас. Бу қанақадир ҳарбий объект ёки олтин конь эмаски, беркитилса", дейди у.

Маҳмудовнинг қўшимча қилишича, мазкур қурилиш уч томонлама хусусий шерикчилик асосида режалаштирилган бўлиб, унда Чилонзор туман ҳокимлиги, "Бешйўғоч" маҳалласи ҳамда "One Housing Group" иштирок этиши керак.

"Хусусий шерикчилик тўғрисидаги қонунга кўра, ҳамма нарса очиқ маълумот ҳисобланиши керак. Очиқ маълумотларда бошқа шериклар кўрсатилган, аммо “One Housing Group” у ерда йўқ. Буни интернетдан скриншот қилиб, судга тақдим этдик", дея таъкидлайди у.

Бундан ташқари, Маҳмудов маҳалла биноси тушган ер майдони аслида кимга қарашлилиги номаълумлигича қолаётганини билдирди. Шунинг учун ҳам суд кейинги йиғинда Кадастр агентлигидан мутахассис жалб қилмоқда.

"Бу мулкда кадастр йўқ. Бу бино уч йил олдин қурилган, лекин оқсоқолимизнинг айтишича, ҳокимият ҳар хил йўллар билан кадастр олишига халақит қилиб келган. Бу ерда ҳоким хоҳлаган одамнинг биносини бошқа шахсга бериб юбораётганга ўхшайди. Бу бинонинг биринчи эгасини топиш керак-да, агар қонуний бўлса, бунга кадастр бериш шарт", дейди даъвогар.