Блогер "Жасжан" беш суткага қамалди

Қайд этилишича, жорий йилнинг 13 январь куни Шодиев Шайхонтоҳур туманида жойлашган боғларнинг бирида 2005 йилда туғилган С.С. билан жамоат жойида жанжал чиқарган. 

ИИО ходимлари томонидан ўтказилган текширув жараёнида ушбу ҳолат блогер ҳамда унинг таниши С.С. томонидан ўзаро саҳналаштирилганлиги ва ижтимоий тармоқда жойлаштириш учун видеога олинганлиги аниқланган. 

Мазкур ҳолат юзасидан Шайхонтоҳур тумани ИИО ФМБ томонидан Маъмурий жавобгарлик тўғрисидаги кодекснинг 183-моддаси (Майда безорилик) билан баённома расмийлаштирилиб, тўпланган ҳужжатлар қонуний чора кўришлик учун Жиноят ишлари бўйича Шайхонтоҳур туман судига юборилган. 

Суд блогерга 5 сутка маъмурий қамоқ, унинг шеригига эса БҲМнинг 1 баравари миқдорида маъмурий жарима жазоси тайинлади. 

Эслатиб ўтамиз, аввалроқ ижтимоий тармоқларда Тошкент вилоятининг Чирчиқ шаҳрида истиқомат қилувчи 24 ёшли блогер 100 мингта "like" учун отасини уришини айтгани тасвирланган видео тарқалиб, йигитга 15 сутка маъмурий қамоқ жазоси белгиланганди.