Нилуфар Ҳамидова 7 суткага қамалди

Актриса ва блогер Нилуфар Ҳамидова 7 суткага маъмурий қамоқ жазосига ҳукм қилинди. 2026 йил 5 ноябрь куни Жиноят ишлари бўйича Юнусобод тумани судида Нилуфар Ҳамидовага нисбатан маъмурий ҳуқуқбузарлик тўғрисидаги иш кўриб чиқилган.

Тошкент шаҳар судлари матбуот хизмати маълумотига кўра, суд уни Ўзбекистон Республикаси Маъмурий жавобгарлик тўғрисидаги кодексининг 183-моддаси — майда безориликни содир этганликда айбдор деб топган. Натижада унга 7 сутка маъмурий қамоқ жазоси тайинланган.

Воқеа нимадан бошланган эди?

Можарога Нилуфар Ҳамидованинг Тошкент кўчаларида тасвирга олиб, ижтимоий тармоқларга жойлаштирган видеолавҳаси сабаб бўлган. Роликдаги хатти-ҳаракатлар ва ифодалар фойдаланувчилар орасида эътирозларга сабаб бўлди.

Видеода Ҳамидова бир неча марта «Яна хоҳлайман» иборасини такрорлаган. Ролик якунида гап косметика маҳсулотлари тўплами ҳақида кетаётгани маълум бўлган. Бироқ видеонинг тақдим этилиш шакли жамоатчиликда турлича талқинларга сабаб бўлган.

Ҳолатдан кейин ички ишлар органлари суриштирув ўтказиб, блогернинг хатти-ҳаракатларига ҳуқуқий баҳо берган. Тўпланган ҳужжатлар судга юборилган.

Ҳамидова ҳуқуқ-тартибот идоралари ходимлари билан суҳбатда қилмиши учун узр сўраган ва бундай мазмундаги видеоларни бошқа эълон қилмаслигини билдирган.

183-модда нимани назарда тутади?

Маъмурий жавобгарлик тўғрисидаги кодекснинг 183-моддаси майда безориликка оид. Унда жамоат жойларида уятли сўзлар билан сўкиниш, фуқароларга ҳақоратомуз шилқимлик қилиш, шунингдек, жамоат тартиби ва фуқаролар осойишталигини бузувчи бошқа хатти-ҳаракатлар назарда тутилган.

Мазкур ҳуқуқбузарлик учун базавий ҳисоблаш миқдорининг 3 бараваридан 5 бараваригача жарима ёки 15 суткагача маъмурий қамоқ жазоси белгиланган.

Ҳамидовага тайинланган 7 суткалик қамоқ ушбу моддада назарда тутилган маъмурий жазо турларидан биридир. Бу жиноий жазо эмас, маъмурий жавобгарлик чораси ҳисобланади.

Бу Ҳамидова билан боғлиқ биринчи баҳсли ҳолат эмас

Нилуфар Ҳамидова аввал ҳам ижтимоий тармоқлардаги чиқишлари ва оммавий тадбирлардаги иштироки билан боғлиқ муҳокамалар марказида бўлган.

2026 йил апрель ойида Тошкент вилояти Оққўрғон туманидаги 48-сонли мактабда унинг иштирокида ўтказилган тадбир жамоатчилик эътирозларига сабаб бўлганди. Шундан кейин Тошкент вилояти Мактабгача ва мактаб таълими бошқармаси ҳолат юзасидан муносабат билдириб, масъул шахсларнинг хатти-ҳаракатларига ҳуқуқий баҳо бериш бўйича ўрганиш олиб борилаётганини маълум қилган.

Бундан ташқари, Ҳамидова аввалги ижтимоий тармоқлардаги чиқишлари сабабли «Ўзбекконцерт» давлат муассасаси томонидан лицензия талаблари ва шартларига риоя этиш юзасидан огоҳлантирилгани ҳақида ҳам хабарлар тарқалган.

Муаллиф: Ҳасанбой ОЧУН