Бухорода ўзи билан икки фарзандини сувга ташламоқчи бўлган аёлга ҳукм ўқилди

Бухоро вилоятида 22 ёшли аёл иккала фарзанди билан бирга ўз жонига қасд қилишга уринди. Бу ҳақда Bu kun дастури репортажида хабар берилди.

Ҳис-ҳаяжон таъсирида у икки фарзандини олиб, канал томон йўл олган. У ерда аввал катта ўғлини сувга ташлаган, сўнгра эса қўлида кичик фарзанди билан ўзи ҳам сувга сакраган.

Воқеага гувоҳ бўлган фуқаролар катта болани қутқариб қолишган. Аёл эса кичик ўғлини сувдан ўзи чиқарган. Барча жабрланувчилар шифохонага етказилган.

Гарчи оғир оқибатлар олди олинган бўлса-да, Ромитан тумани суди аёлни вояга етмаган икки фарзандини қасддан ўлдиришга суиқасд қилишда айбдор деб топди.

Суд ҳукмига кўра, у Ўзбекистон ЖКнинг 97-моддаси 2-қисми «а, в» бандлари (икки ёки ундан ортиқ, айбдор учун ожиз ҳолда бўлган шахсларни қасддан ўлдиришга суиқасд) билан жиноят содир этганликда айбдор деб топилди ва 4 йилга озодликдан маҳрум этилди.