Фуқароларга энергия самарадор қурилмаларни харид қилиш ва ўрнатиш учун субсидия ажратилади

Низом аҳоли уй-жойларини энергия аудитидан ўтказиш харажатларини тўлиқ қоплаш, шунингдек, қуёш панеллари, гелиоколлекторлар, иссиқлик насослари ва бошқа маиший иситиш қурилмалари ҳамда ускуналарни харид қилиш ва ўрнатиш харажатларининг бир қисмини қоплаш учун субсидия ажратиш тартибини белгилайди.

Асосий тартиб ва шартлар:

Субсидия аҳоли уй-жойларига энергия самарадор қурилмалар энергия аудитори хулосаси асосида ўрнатилганда берилади;

Талабгор қурилма ва ускуналар учун тўловни субсидия миқдори чегирилган ҳолда амалга оширади;

Қоплаб берилган (субсидия қилинадиган) қисмни Энергия самарадорлиги миллий агентлиги етказиб берувчига тўлаб беради.

Субсидия миқдори қуйидагича белгиланган:

уй-жойларни энергия аудитидан ўтказиш харажатларининг 100 фоизи;

қуёш панеллари, гелиоколлекторлар ва бошқа маиший иситиш қурилмаларини харид қилиш ҳамда ўрнатиш харажатларининг 20 фоизи;

иссиқлик насосларини харид қилиш ва ўрнатиш харажатларининг 40 фоизи,

бироқ субсидия миқдори базавий ҳисоблаш миқдорининг 50 бараваридан ошмаслиги лозим.

Агар талабгор тижорат банклари орқали “яшил кредит” олиш мақсадида уй-жойни энергия аудитидан ўтказишни сўраса, шартнома маблағи 100 фоиз миқдорда олдиндан ўтказилади ва электрон платформада вақтинча банд қилинади.