Fuqarolarga energiya samarador qurilmalarni xarid qilish va oʻrnatish uchun subsidiya ajratiladi

Nizom aholi uy-joylarini energiya auditidan oʻtkazish xarajatlarini toʻliq qoplash, shuningdek, quyosh panellari, geliokollektorlar, issiqlik nasoslari va boshqa maishiy isitish qurilmalari hamda uskunalarni xarid qilish va oʻrnatish xarajatlarining bir qismini qoplash uchun subsidiya ajratish tartibini belgilaydi.

Asosiy tartib va shartlar:

Subsidiya aholi uy-joylariga energiya samarador qurilmalar energiya auditori xulosasi asosida oʻrnatilganda beriladi;

Talabgor qurilma va uskunalar uchun toʻlovni subsidiya miqdori chegirilgan holda amalga oshiradi;

Qoplab berilgan (subsidiya qilinadigan) qismni Energiya samaradorligi milliy agentligi yetkazib beruvchiga toʻlab beradi.

Subsidiya miqdori quyidagicha belgilangan:

uy-joylarni energiya auditidan oʻtkazish xarajatlarining 100 foizi;

quyosh panellari, geliokollektorlar va boshqa maishiy isitish qurilmalarini xarid qilish hamda oʻrnatish xarajatlarining 20 foizi;

issiqlik nasoslarini xarid qilish va oʻrnatish xarajatlarining 40 foizi,

biroq subsidiya miqdori bazaviy hisoblash miqdorining 50 baravaridan oshmasligi lozim.

Agar talabgor tijorat banklari orqali “yashil kredit” olish maqsadida uy-joyni energiya auditidan oʻtkazishni soʻrasa, shartnoma mablagʻi 100 foiz miqdorda oldindan oʻtkaziladi va elektron platformada vaqtincha band qilinadi.