20 йиллик меҳнат стажига эга аёллар учун пенсия ёшини бир йилга қисқартириш таклиф этилмоқда

Иқтисодиёт ва молия вазирлиги “Давлат пенсия таъминоти соҳасида замонавий хизматларни жорий этиш бўйича қўшимча чора-тадбирлар тўғрисида”ги қарор лойиҳасини жамоатчилик муҳокамасига тақдим этди.

Лойиҳага кўра, жорий йил 1 июндан бошлаб қатор пенсия хизматларини фуқароларнинг алоҳида мурожаатисиз, проактив шаклда амалга ошириш таклиф қилинмоқда.

Жумладан:

• 20 йил меҳнат стажига эга аёлларга ёшга доир пенсия тайинлашда умумий пенсия ёшини бир йилга камайтириш;
• иш ўринлари қисқариши, иш ҳажмининг камайиши ёки корхона тугатилиши сабабли ишдан бўшатилган ва ишсиз деб топилган фуқароларга белгиланган пенсия ёшидан икки йил олдин пенсия тайинлаш.

Шунингдек, 2027 йил 1 январдан бошлаб Пенсия жамғармаси фуқаролардан ҳужжат ва маълумотларни қоғоз шаклида қабул қилишни тўхтатиши режалаштирилган.

Қарор лойиҳасининг жамоатчилик муҳокамаси 26 февралга қадар давом этади.