Солиқдан қарзи борлар электр учун тўлов қилолмайди

Президент «Солиқларнинг йиғилувчанлик даражасини ошириш ва фаол солиқ тўловчиларни рағбатлантириш чора-тадбирлари тўғрисида»ги қарорни имзолаган эди.

Ҳужжатга кўра, 2026 йилдан бошлаб Наманган вилоятида янги солиқ бошқаруви моделини жорий этиш бўйича эксперимент ўтказилади.

Жисмоний шахслардан олинадиган мол-мулк ва ер солиғи бўйича қарздорлик умумий суммаси 1 миллион сўмдан ошган ҳолатлар аниқланади. Бундай қарздорликни ундириш жараёнида электр энергиясининг биллинг тизими механизмидан фойдаланилади.

Барча ҳудудларда жорий этилади

Солиқ қўмитаси 2026 йил 1 октябрга қадар эксперимент натижалари асосида уни бошқа ҳудудларда жорий этиш бўйича таклифларни ҳукуматга киритади.

Бу илк чеклов эмас

Ноябрдан бошлаб Тошкентда Ҳудудий электр тармоқлари чиқинди ташиш бўйича тўланмаган қарзи бор абонентлар учун электр энергиясига тўловни қабул қилишни чеклай бошлаган эди. Янги тартиб декабрдан бутун Ўзбекистон бўйлаб амалда бўлиши белгиланган.

Қарздорлар ҳақидаги маълумотлар ҳар ойнинг 3-санасига қадар «Тоза Макон» биллинг тизимидан HET Billing тизимига огоҳлантириш юбориш учун тақдим этилади. Агар абонент огоҳлантириш олгандан кейин 5 кун ичида қарзни тўламаса, чекловлар жорий этилади.