Маданият вазирлиги санъаткорлар учун солиқда енгиллик беришни таклиф қилди

Бу борада Маданият вазирлиги ўз муносабатини билдирди.

Янги тартиб нима?

Адлия вазирлиги томонидан ишлаб чиқилган қарор лойиҳасига кўра, 2026 йил 1 сентябрдан санъаткорлар кўрсатаётган хизматларни Soliq мобил иловаси орқали мажбурий рўйхатдан ўтказиш таклиф этилган.

Ҳужжатга мувофиқ, тўй, юбилей, суннат тўйи, никоҳ маросимлари, ресторан ва бошқа тадбирлардаги ҳар бир чиқиш “бир хизмат — бир тўлов” тамойили асосида алоҳида ҳисобга олиниб, солиққа тортилиши режалаштирилган.

Амалдаги солиқ тартиби

Маданият вазирлиги маълум қилишича, концерт-томоша соҳасида фаолият юритаётган шахслар ҳозирда ҳам амалдаги қонунчиликка мувофиқ солиқ тўлаб келмоқда.

Жумладан:

• ҳар ойда камида бир баравар базавий ҳисоблаш миқдори (412 минг сўм) миқдорида ижтимоий солиқ;
• йиллик даромаддан 12 фоиз даромад солиғи тўланади.

Шу боис, “санъаткорлар умуман солиқ тўламайди” деган қарашлар тўлиқ ҳақиқатга мос эмаслиги таъкидланди.

Вазирлик таклифлари

Маданият вазирлиги қарор лойиҳаси юзасидан бир қатор таклифлар киритган. Улар қуйидагиларни ўз ичига олади:

• солиқ юкини енгиллаштириш;
• солиқ ставкаларини тоифалар бўйича адолатли белгилаш;
• соҳа вакиллари учун табақалаштирилган ёндашув жорий этиш;
• айрим нормаларни аниқлаштириш.

Вазирлик ушбу масалада жамоатчилик фикри муҳим эканини таъкидлаб, якуний қарор қонунийлик, адолат ва амалий самарадорлик тамойиллари асосида қабул қилиниши зарурлигини қайд этди.