Тошкент халқаро молия маркази тўғрисидаги қонун имзоланди

Янги қонунга кўра, Тошкент халқаро молия маркази Англия ҳуқуқи асосида ишлайдиган, алоҳида ҳуқуқий мақомга эга ҳудуд сифатида фаолият юритади. Марказда махсус тартибга солиш тизими, мустақил тижорат суди ҳамда халқаро стандартларга мос ҳуқуқий муҳит шакллантирилади.

Таъкидланишича, бундай тизим халқаро инвесторлар, банклар, инвестиция фондлари ва молия институтлари учун тушунарли ва ишончли механизмларни яратади. Бу эса Ўзбекистоннинг халқаро капитални жалб қилиш имкониятларини кенгайтириши кутилмоқда.

Президент Администрацияси раҳбари Саида Мирзиёеванинг таъкидлашича, мазкур қонун “жаҳон бозорининг энг қимматли активи — ишончга киритилган инвестиция” ҳисобланади.

Унинг сўзларига кўра, Тошкент халқаро молия маркази инвесторлар учун аниқ ва шаффоф қоидаларни, капиталнинг юқори даражадаги ҳуқуқий ҳимоясини таъминлаб, Ўзбекистонни жаҳон молия тизимининг муҳим қисмига айлантиришга хизмат қилади.

Шунингдек, бу қарор жорий йилдаги энг муҳим иқтисодий янгиликлардан бири ҳамда сўнгги ўн йил давомида амалга оширилган иқтисодий ислоҳотларнинг мантиқий давомидир.