Хитойнинг ойлик автомобил экспорти 1 миллион донадан ошди

Хитойнинг ойлик автомобил экспорти июнь ойида тарихда илк бор 1 миллион донадан ошди. Шу билан бирга, дунёнинг иккинчи йирик иқтисодиёти бўлган мамлакатнинг умумий экспорти ўтган йилнинг шу даврига нисбатан 27 фоизга ўсди.

Хитой божхонасининг расмий маълумотларига кўра, Доналд Трампнинг чекланган тариф “уруши”га қарамай, кутилганидан анча юқори савдо кўрсаткичлари Хитойга ўтган йилги 1 триллион долларлик рекорд савдо профицитини такрорлаш ёки ундан ҳам ошириш имконини бермоқда.

BYD ва Jaecoo каби Хитой брендларининг савдоси жадал юксалмоқда. Натижада улар узоқ йиллардан бери бозорда етакчи бўлиб келган (айниқса, Европада) автомобил ишлаб чиқарувчиларнинг улушини қисқартирмоқда.

Берлиндаги Меркатор Хитой тадқиқотлари институти (Merics) таҳлилига кўра, 2026 йилнинг биринчи ярмида Хитойнинг Европа Иттифоқи билан товар айирбошлашдаги профицити кунига 900 миллион еврони ташкил этган.

Хитойнинг Европа Иттифоқига экспорти бир йил ичида 12,7 фоизга ошди.

Европа саноати босим остида

2024 йилда Европа Иттифоқи жорий этган Хитой электромобилларига тарифлардан электр ва гибрид автомобиллар четда қолгани сабабли, уларнинг экспорти кескин ошди. Бу эса Европа автомобил саноатига катта босим ўтказиб, сўнгги пайтларда тармоқда иш ўринлари кескин қисқариши мумкинлиги ҳақида огоҳлантиришлар янграмоқда.

Европанинг энг йирик автомобил ишлаб чиқарувчиси Volkswagen 670 минг кишилик ишчи кучини 100 минг нафаргача қисқартиришни режалаштирмоқда.

Merics таҳлилчиси ва савдо бўйича мутахассис Рафаэл Хименес Буендиянинг айтишича, Европа Иттифоқига экспорт ҳажмининг кескин ортиши савдолар бўйича кутилган рекорд даражадаги прогнозлардан ҳам ошиб кетган.

Институт Хитойнинг Европа Иттифоқига экспорти йилнинг биринчи ярмида кўпи билан 296 миллиард доллар бўлишини прогноз қилган эди. Бироқ сешанба куни эълон қилинган расмий маълумотларга кўра, бу кўрсаткич прогноздан қарийб 6,3 миллиард доллар кўп бўлиб, 302 миллиард долларга етган.

Чип экспорти

Хитой экспортининг ўсишига глобал сунъий интеллект соҳасидаги тараққиёт ортидан чипларга бўлган буюртмалар ошиши ҳам туртки бўлди. 

Маълумотларга кўра, мамлакат 32 миллиард дона интеграл микросхема экспорт қилган.

“Хитой шоки 2.0” такрорланиши мумкин

Мамлакатнинг юқори экспорт кўрсаткичлари қисман ички талабнинг сустлиги билан изоҳланмоқда. Бу эса кўпчилик томонидан “Хитой шоки 2.0” (China shock 2.0) деб таърифланаётган, яъни 2000-йиллардаги АҚШга экспорт тўлқинининг такрорланиши юзасидан хавотирларни кучайтирмоқда.

Gavekal Dragonomics консалтинг компаниясининг яқинда эълон қилган ҳисоботига кўра, жорий йилнинг дастлабки тўрт ойида йиллик экспортнинг умумий саноат ишлаб чиқаришидаги улуши 24 фоизга етган.

Бу Хитой 2001 йилда Жаҳон савдо ташкилотига аъзо бўлганидан бери қайд этилган энг юқори кўрсаткичдир. 2019 йилда бу нисбат 18,3 фоизни ташкил этган бўлса, ўтган йили 22,3 фоизгача ошган эди.