«Янги банк» лицензияси бекор қилинди. Омонат пуллари нима бўлади?

Бу қарор банк фаолиятида мавжуд муаммоларни бартараф этиш бўйича кўрилган чоралар кутилган натижа бермагани билан боғлиқ. Хусусан, банкнинг устав капитали қонунчиликда белгиланган минимал талабларга етказилмаган, шунингдек, айрим мажбурий талаблар бажарилмаган.

Шу билан бирга, амалдаги қонунларга мувофиқ банк фаолиятини тугатиш жараёни бошланди. Бу ишларни амалга ошириш учун махсус тугатиш комиссияси тайинланди.

Омонатчилар учун муҳим маълумот

Марказий банк маълум қилишича, банкда жойлаштирилган омонатлар давлат томонидан белгиланган тартибда кафолатланади.

Шу сабабли, «Янги банк»да омонатга эга бўлган фуқаролар ва ташкилотлар ўз кафолатланган маблағларини Омонатларни кафолатлаш агентлиги орқали қайтариб олишлари мумкин.

Дастлабки маълумотларга кўра, жами 32 526 нафар омонатчидан 32 153 нафарига омонат маблағлари тўлиқ қайтарилади. Қолган 373 нафар омонатчи бўйича эса кафолатланган суммадан ортиқ қисми қонунчиликка мувофиқ тугатиш комиссияси қарори асосида тўлаб берилади.

Омонатлар бўйича тўловлар ҳақида қўшимча маълумотни 55-550-05-00 рақами орқали олиш мумкин.

Марказий банк ушбу жараённи назорат қилиб бормоқда ва қўшимча маълумотлар бериб борилади.