«Yangi bank» litsenziyasi bekor qilindi. Omonat pullari nima boʻladi?

Bu qaror bank faoliyatida mavjud muammolarni bartaraf etish boʻyicha koʻrilgan choralar kutilgan natija bermagani bilan bogʻliq. Xususan, bankning ustav kapitali qonunchilikda belgilangan minimal talablarga yetkazilmagan, shuningdek, ayrim majburiy talablar bajarilmagan.

Shu bilan birga, amaldagi qonunlarga muvofiq bank faoliyatini tugatish jarayoni boshlandi. Bu ishlarni amalga oshirish uchun maxsus tugatish komissiyasi tayinlandi.

Omonatchilar uchun muhim maʼlumot

Markaziy bank maʼlum qilishicha, bankda joylashtirilgan omonatlar davlat tomonidan belgilangan tartibda kafolatlanadi.

Shu sababli, «Yangi bank»da omonatga ega boʻlgan fuqarolar va tashkilotlar oʻz kafolatlangan mablagʻlarini Omonatlarni kafolatlash agentligi orqali qaytarib olishlari mumkin.

Dastlabki maʼlumotlarga koʻra, jami 32 526 nafar omonatchidan 32 153 nafariga omonat mablagʻlari toʻliq qaytariladi. Qolgan 373 nafar omonatchi boʻyicha esa kafolatlangan summadan ortiq qismi qonunchilikka muvofiq tugatish komissiyasi qarori asosida toʻlab beriladi.

Omonatlar boʻyicha toʻlovlar haqida qoʻshimcha maʼlumotni 55-550-05-00 raqami orqali olish mumkin.

Markaziy bank ushbu jarayonni nazorat qilib bormoqda va qoʻshimcha maʼlumotlar berib boriladi.