Банк ходими 13 нафар фуқаронинг 1,3 млрд сўмини ўзлаштирди

Бош прокуратура ҳузуридаги Иқтисодий жиноятларга қарши курашиш департаменти маълумотига кўра, ҳолат юзасидан жиноят иши қўзғатилган.

Департаментнинг Чирчиқ шаҳри бўлими томонидан ўтказилган терговга қадар текширув давомида тижорат банкининг БХМ бўлими бошлиғи О.Р. фуқаролардан омонатга қўйиш учун қабул қилган пул маблағларини банк кассасига расмий кирим қилмагани аниқланган.

Текширувда маълум бўлишича, банк ходими мазкур маблағлар гўёки банкка кирим қилингани ҳақида омонат ҳисобварақларига сохта маълумотлар киритган. Шу йўл билан у жами 1,3 млрд сўм маблағни ўз тасарруфига олиб, шахсий эҳтиёжлари учун ишлатган.

Мазкур ҳолат бўйича О.Р.га нисбатан Ўзбекистон Республикаси Жиноят кодексининг 167-моддаси, яъни ўзлаштириш ёки растрата йўли билан талон-торож қилиш жинояти бўйича иш қўзғатилган.

Ҳозирда жиноят иши доирасида тергов ҳаракатлари олиб борилмоқда. Тергов натижаларига кўра, ҳолатнинг бошқа тафсилотларига ҳуқуқий баҳо берилиши кутилмоқда.

Муаллиф: Ҳасанбой ОЧУН