АҚШ наркотрафикда гумонланган тезюрар кемага ракета зарбаси берди

Бу ҳақда АҚШ Жанубий қўмондонлиги маълум қилди.

Ижтимоий тармоқларда тарқалган видеоларда ракета тезюрар кемага аниқ тегиб, унинг ёниб кетгани акс этган.

Маълум қилинишича, мазкур операция Дональд Трамп маъмурияти бошлаган наркотрафикка қарши ҳарбий кампания доирасида амалга оширилган. Расмий маълумотларга кўра, ушбу кампания бошланганидан бери Тинч океанида ўтказилган шунга ўхшаш операциялар натижасида ҳалок бўлганлар сони 211 нафарга етган.

Операция қонунийлиги юзасидан баҳслар кучаймоқда

Дональд Трамп маъмурияти АҚШ мамлакат ҳудудига гиёҳванд моддалар етказиб берувчи картеллар билан «қуролли тўқнашув» ҳолатида эканини таъкидлаб келмоқда.

Бироқ ҳуқуқ ҳимоячилари ҳамда айрим америкалик сиёсатчилар бу каби ҳарбий амалиётларнинг халқаро ҳуқуқ нуқтаи назаридан қонунийлигига шубҳа билдирмоқда.

Танқидчиларнинг фикрича, ҳужумларда наркотрафикка алоқаси бўлмаган оддий балиқчилар ҳам қурбон бўлган бўлиши мумкин. Шу билан бирга, Пентагон ҳозиргача ҳалок бўлган барча шахслар наркотрафик билан шуғулланганини тасдиқловчи аниқ далилларни оммага тақдим этмаган.

Шу муносабат билан АҚШ Конгрессидаги айрим сенаторлар операциялар юзасидан тўлиқ видеоёзувларни эълон қилиш ва мустақил текширув ўтказишни талаб қилмоқда.