Трамп Канада билан яқинлашгани учун ЕИга таҳдид қилди

АҚШ президенти Дональд Трамп Европа Иттифоқининг Канадани биринчи “ассоциацияланган аъзо”га айлантириш имкониятини муҳокама қилаётганига муносабат билдирди.

Трамп ЕИ ва Канада ўртасидаги яқинлашувни танқид қилиб, Канада АҚШ учун “ёмон савдо ҳамкори” эканини айтди. Унинг таъкидлашича, агар Европа Иттифоқининг бу ташаббуси АҚШ учун душманона қадам сифатида баҳоланса, Вашингтон Европа давлатларига нисбатан “жуда жиддий тарифлар” жорий қилиши ёки айрим йўналишларда савдони тўхтатиши мумкин.

Бу баёнот Европа комиссияси раиси Урсула фон дер Ляйеннинг 16 сентябрда Европа парламентида қилган чиқишидан кейин янгради. У Канада бош вазири Марк Карни иштирокидаги нутқида Канада учун ЕИнинг биринчи “ассоциацияланган аъзоси” бўлиш йўлини очиш устида ишлашни таклиф қилди.

Европа комиссияси маълумотларига кўра, Брюссель ва Оттава муносабатларни савдо, мудофаа саноати, сунъий интеллект, энергетика, муҳим минераллар ва бошқа соҳаларда кенгайтиришни режалаштирмоқда. ЕИ ва Канада ўртасидаги товарлар савдоси CETA келишуви амалга кирганидан кейин бир неча йил ичида 75 фоизга ўсган.

Айни пайтда ЕИ шартномаларида “ассоциацияланган аъзолик” тушунчаси аниқ белгиланмаган. Шунинг учун фон дер Ляйеннинг таклифи ҳозирча сиёсий ташаббус бўлиб, уни амалга ошириш механизми алоҳида келишувларни талаб қилади.