АҚШда 2026 йилда депортация ва ҳибсга олишлар сони рекордга етди

Демократлар келаси йил Конгресс назоратини қўлга киритгач, миграция сиёсати ва Иммиграция ва божхона назорати хизмати (ICE) фаолиятини текширишни режалаштирмоқда.

АҚШда Дональд Трамп маъмуриятининг миграция сиёсати доирасида депортация ва ҳибсга олишлар сони мамлакат тарихидаги энг юқори кўрсаткичга етди. Бу ҳақда АҚШ Миллий хавфсизлик вазирлиги (DHS) маълум қилди.

Вазирликнинг чоршанба куни эълон қилган ҳисоботига кўра, 2026 молиявий йили давомида Иммиграция ва божхона назорати хизмати 483 200 кишини АҚШдан депортация қилган. Шунингдек, миграция қонунчилиги бузилиши билан боғлиқ 491 мингдан ортиқ ҳибсга олиш ҳолати қайд этилган.

Депортациялар сони ICEнинг 23 йиллик тарихидаги энг юқори натижа бўлди. Бундан аввалги рекорд 2025 йилда қайд этилган бўлиб, ўшанда 442 640 киши мамлакатдан чиқариб юборилган.

АҚШ ички хавфсизлик вазири Марквейн Маллиннинг таъкидлашича, 2026 молиявий йили ICE тарихида депортация ва ҳибсга олишлар энг кўп амалга оширилган давр бўлган. 2026 йил сентябрь ойи эса ҳибсга олишлар бўйича хизмат тарихидаги энг юқори кўрсаткич қайд этилган ой бўлди.

ICE сентябрь ойида 48 мингдан ортиқ кишини ҳибсга олган. Августда эса бу рақам 50 925 нафарни ташкил этган эди.

Рақамлар бўйича саволлар

Вашингтондаги Миграция тадқиқотлари маркази (CIS) тадқиқот директори Стивен Камарота Al Jazeera нашрига берган интервьюсида Трамп маъмурияти аввалги президентларга нисбатан миграция қонунчилиги ижросини анча кучайтирганини айтди.

Унинг фикрича, назорат чораларининг кучайтирилиши мамлакатда ҳужжатсиз муҳожирлар сони камайишига ҳам таъсир кўрсатган бўлиши мумкин. Жумладан, депортация хавфи сабаб айрим муҳожирлар АҚШни ўз ихтиёри билан тарк этмоқда.

Бироқ Камарота Миллий хавфсизлик вазирлиги эълон қилган статистикада аниқлик талаб қиладиган жиҳатлар борлигини таъкидлади. Хусусан, депортация қилинганларнинг қанчаси мамлакат ичкарисидаги рейдлар давомида ушлангани, қанчаси эса чегара ёки аэропортларда АҚШга киритилмагани очиқланмаган.

Трамп миграция сиёсати «ҳаддан ташқари қаттиқ» бўлганини тан олган

АҚШ президенти Дональд Трамп аввалроқ ўз маъмуриятининг миграция сиёсати айрим ҳолларда «ҳаддан ташқари қаттиқ» бўлган бўлиши мумкинлигини тан олган эди.

CBS телеканалидаги 60 Minutes дастурига берган интервьюсида у ўз сиёсатини ҳимоя қилган. Трамп жиноят содир этган муҳожирларни мамлакатдан чиқариш бўйича юқори натижаларга эришганини айтган. Бироқ АҚШга ноқонуний киргани сабабли жазоланган ва мамлакатда қонуний меҳнат фаолияти билан шуғулланган айрим одамлар ҳам депортация қилинганини тан олган.

Reuters сўровига кўра, Трампнинг миграция сиёсати бўйича жамоатчилик қўллаб-қувватлаши президентлик фаолияти бошидаги 50 фоиздан 38 фоизга тушган.

Демократлар ICE фаолиятини текширмоқчи

Демократлар келаси йили Конгрессда назоратни қўлга киритгач, Трамп маъмуриятининг миграция сиёсатига қарши чоралар кўришни режалаштирмоқда. Улар ICE фаолиятида қўлланилаётган усулларни текшириш ва муҳожирлар учун қонуний мақом олиш имкониятларини кенгайтиришни кўзламоқда.

Конгресс Вакиллар палатасининг Миллий хавфсизлик қўмитаси бўлажак раҳбари, демократ Бенни Томпсон Reuters агентлигига берган баёнотида маъмуриятнинг Миллий хавфсизлик вазирлигидан америкаликларга қарши фойдаланиши ва назоратдан чиққан миграция сиёсати юзасидан текширув ўтказиш ниятини билдирган.

Айрим демократлар эса ICE фаолиятини тубдан ўзгартириш тарафдори эканини очиқ айтмоқда. Миннесота штатида сенаторликка сайланган Пегги Фланаган «Биз ICEни парчалаб ташлаймиз», деб баёнот берган.

Унинг бу чиқиши Миннеаполисда федерал миграция агентлари иштирокида икки нафар АҚШ фуқароси ҳалок бўлган воқеалар ортидан янгради. Алекс Претти ва Рене Николь Гуднинг отиб ўлдирилиши тасвирлари ижтимоий тармоқларда кенг тарқалиб, халқаро миқёсда ҳам танқидларга сабаб бўлган.

Воқеа жойидаги видеоларда ниқоб таққан агентлар кимёвий воситалар қўллагани ва ўз фаолиятини тасвирга олган ёки норозилик билдирган фуқароларга нисбатан куч ишлатгани акс этган. Мақолада қайд этилишича, бундай тасвирга олиш ва тинч норозилик билдириш АҚШ Конституцияси билан ҳимоя қилинадиган ҳуқуқлар қаторига киради.русча инглизчага угир