АҚШ ўнлаб БМТ ва халқаро ташкилотлардан чиқмоқчи

Оқ уй тарқатган президентлик меморандумида айтилишича, мазкур қарор АҚШ манфаатларига зид деб топилган ташкилотлар, конвенциялар ва шартномаларни қайта кўриб чиқиш натижасида қабул қилинган. АҚШ ушбу тузилмаларда иштирокни тўхтатиб, уларга ажратиладиган барча молиявий маблағларни қисқартиришни ҳам режалаштирмоқда.

Маълум қилинишича, чиқиш режаси 35 та БМТга кирмайдиган халқаро ташкилотни қамраб олади. Улар орасида Иқлим ўзгариши бўйича ҳукуматлараро экспертлар гуруҳи (IPCC), Демократия ва сайловларга кўмаклашувчи халқаро институт ҳамда Табиатни муҳофаза қилиш халқаро иттифоқи бор.

Шунингдек, АҚШ 31 та БМТ тузилмаси, жумладан Иқлим ўзгариши бўйича БМТ асосий келишуви (UNFCCC), БМТ Демократия жамғармаси ва она ҳамда болалар саломатлиги билан шуғулланувчи UNFPAдан чиқишни ҳам режалаштирмоқда.

БМТ матбуот котиби Стефан Дюжаррик мазкур қарорга нисбатан яқин соатларда расмий муносабат билдирилишини маълум қилди.

Маълумот ўрнида, Доналд Трамп иккинчи президентлик муддати давомида АҚШни Жаҳон соғлиқни сақлаш ташкилоти (ЖССТ), Париж иқлим келишуви ҳамда БМТ Инсон ҳуқуқлари кенгашидан чиқарган эди. АҚШнинг ЖССТдан чиқиши 2026 йил 22 январь куни кучга кириши кутилмоқда.

Шунингдек, Трамп маъмурияти Фаластин қочқинлари бўйича БМТ агентлиги — UNRWAни молиялаштиришни тўхтатиш қарорини ҳам сақлаб қолмоқда.