AQSh oʻnlab BMT va xalqaro tashkilotlardan chiqmoqchi

Oq uy tarqatgan prezidentlik memorandumida aytilishicha, mazkur qaror AQSh manfaatlariga zid deb topilgan tashkilotlar, konvensiyalar va shartnomalarni qayta koʻrib chiqish natijasida qabul qilingan. AQSh ushbu tuzilmalarda ishtirokni toʻxtatib, ularga ajratiladigan barcha moliyaviy mablagʻlarni qisqartirishni ham rejalashtirmoqda.

Maʼlum qilinishicha, chiqish rejasi 35 ta BMTga kirmaydigan xalqaro tashkilotni qamrab oladi. Ular orasida Iqlim oʻzgarishi boʻyicha hukumatlararo ekspertlar guruhi (IPCC), Demokratiya va saylovlarga koʻmaklashuvchi xalqaro institut hamda Tabiatni muhofaza qilish xalqaro ittifoqi bor.

Shuningdek, AQSh 31 ta BMT tuzilmasi, jumladan Iqlim oʻzgarishi boʻyicha BMT asosiy kelishuvi (UNFCCC), BMT Demokratiya jamgʻarmasi va ona hamda bolalar salomatligi bilan shugʻullanuvchi UNFPAdan chiqishni ham rejalashtirmoqda.

BMT matbuot kotibi Stefan Dyujarrik mazkur qarorga nisbatan yaqin soatlarda rasmiy munosabat bildirilishini maʼlum qildi.

Maʼlumot oʻrnida, Donald Tramp ikkinchi prezidentlik muddati davomida AQShni Jahon sogʻliqni saqlash tashkiloti (JSST), Parij iqlim kelishuvi hamda BMT Inson huquqlari kengashidan chiqargan edi. AQShning JSSTdan chiqishi 2026 yil 22 yanvar kuni kuchga kirishi kutilmoqda.

Shuningdek, Tramp maʼmuriyati Falastin qochqinlari boʻyicha BMT agentligi — UNRWAni moliyalashtirishni toʻxtatish qarorini ham saqlab qolmoqda.