АҚШ Венесуэлада номаълум «сирли қурол» қўллади — гувоҳлар даҳшатли манзарани тасвирлади

Бу ҳақда Венесуэла хавфсизлик кучлари сафида хизмат қилган шахснинг гувоҳлигига таяниб, АҚШ Оқ уйи матбуот котиби Х ижтимоий тармоғида хабар тарқатди.

Гувоҳнинг айтишича, операция вақтида АҚШ махсус бўлинмалари бирорта ҳам йўқотишсиз юзлаб венесуэлалик ҳарбийларни йўқ қилган. Унинг сўзларига кўра, жанг пайтида қўлланган номаълум қурол таъсирида аскарлар бурнидан қон кетиб, баъзилари қон қуса бошлаган, кўпчилиги эса ҳаракатлана олмай, ерга йиқилган.

Гувоҳ ҳодисаларни шундай тасвирлайди: навбатчилик вақтида тўсатдан барча радар тизимлари ишдан чиққан, осмонда кўплаб дронлар пайдо бўлган. Қисқа вақт ичида тахминан саккизта вертолёт ҳудудга қўниб, 20 нафарга яқин АҚШ махсус бўлинмаси аъзоларини туширган.

Унинг таъкидлашича, бу ҳарбийлар оддий қуроллар билан эмас, юқори технологик воситалар билан жиҳозланган бўлган. «Биз илгари бундай рақибни кўрмаганмиз. Бу уруш эмас, тўлиқ қирғин эди», — дейди у.

Энг даҳшатли паллада, гувоҳнинг айтишича, АҚШ ҳарбийлари номаълум қуролни ишга туширган. У қуролни «жуда кучли товуш тўлқинига ўхшаш таъсир» деб таърифлайди. Шу заҳоти аскарларда кучли бош оғриғи, қон кетиши ва умумий фалаж ҳолати кузатилган.

«Ҳаммамиз бир вақтда бурнимиздан қон кета бошлади. Айримлар қон қусди. Ерга йиқилдик, туришнинг иложи йўқ эди», — дейди гувоҳ.

Собиқ АҚШ разведка манбасига кўра, бу қурол йўналтирилган энергия қуроли — микротўлқин ёки лазер технологияси асосида ишловчи тизим бўлиши мумкин. Бундай қуроллар инсон организмига кучли таъсир ўтказиб, қон кетиши, ҳаракат қобилиятини йўқотиш, оғриқ ва ички жароҳатларга олиб келиши мумкин. Манба таъкидлашича, АҚШ бундай технологияларга ўнлаб йиллардан бери эга, аммо бу уларнинг илк бор очиқ ҳарбий операцияда қўлланиши бўлиши мумкин.

Венесуэла Ички ишлар вазирлигининг расмий маълумотига кўра, 2026 йил 3 январь куни бўлиб ўтган ҳужумда тахминан 100 нафар хавфсизлик ходими ҳалок бўлган. Уларнинг қай даражада номаълум қурол таъсирида ўлгани ҳозирча аниқ эмас.

Рейддан кейин гувоҳ бу воқеалар нафақат Венесуэла, балки бутун Лотин Америкаси учун жиддий сигнал бўлганини таъкидлади. Унинг сўзларига кўра, АҚШ билан тўқнашиш ҳақида ўйлаётган ҳар қандай куч бу воқеалардан хулоса чиқариши керак.

«Мен кўрганларимдан кейин, ҳеч қачон АҚШга қарши бўлишни истамайман. Улар нимага қодир эканини ҳеч ким тасаввур қилмайди», — деди у.