«Биз уларни эркалатиб юбордик» — Сергей Михеев Марказий Осиё давлатлари ҳақида

27 январь куни «Россия 1» телеканали эфирида Марказий Осиё ва Кавказ давлатларига нисбатан баҳсли баёнотлар янгради.

Михеевнинг айтишича, Россия кўп йиллар давомида постсовет маконидаги давлатларни қўллаб-қувватлаб келган, аммо бу уларнинг «эркалаб кетиши»га олиб келган. У, шунингдек, постсовет мамлакатларига нисбатан сиёсатни қайта кўриб чиқиш зарурлигини таъкидлади.

Политолог Россиянинг меҳнат миграцияси, молиявий ёрдам ва бошқа йўналишларда кўплаб муаммоларни ҳал қилиб берганини қайд этиб, шунга қарамай Россия доим қарздордек кўринаётганини айтди. Унинг фикрича, бундай ёндашув Украина билан боғлиқ ҳозирги воқеалар сабабларидан бирига айланган.

Кўрсатув давомида Михеев Россия элчиларининг чақиртирилишига ҳам норозилик билдирди. Суҳбатда у Марказий Осиё давлатлари «ўз ўрнини билиши керак», дея таъкидлади.

Эслатиб ўтамиз, аввалроқ жамоатчилик фаоли Руслан Чагаев Россия Давлат думаси депутати Николай Валуевнинг Марказий Осиё давлатларига нисбатан баёнотларига жавоб қайтаргани ҳақида хабар берилган эди.