Доғистонда сув омбори тўғони ёрилди, кўприк қулаб тушди

Бу ҳақда Россия Фавқулодда вазиятлар вазирлиги маълум қилди.

Эвакуация ишлари

Сув босган ҳудудларда аҳолини эвакуация қилиш ишлари давом этмоқда. Маълум қилинишича, ёғингарчилик сабаб сув омбори тўлиб кетган ва бу ҳимоя иншоотининг бузилишига олиб келган.

Ҳодиса жойига қўшимча кучлар, жумладан 40 нафардан иборат аэромобиль гуруҳ ва махсус техника жалб этилган. Аҳоли учун вақтинчалик жойлаштириш пунктлари ташкил қилинган.

Зарар кўрган ҳудудлар

Мамедқалъа қишлоғида 28 та уй сув остида қолган, 100 га яқин аҳоли хавфсиз жойга кўчирилган. Қишлоқ сув омборидан пастда жойлашгани сабаб тошқин ҳудудига тушган.

Михайловка микрорайонида ҳам кўчаларни сув босгани қайд этилмоқда. Туман бўйлаб 4 мингдан ортиқ аҳолини эвакуация қилиш режалаштирилган.

Сув сатҳи кўтарилиши натижасида Мамедқалъа ҳудудидаги “Кавказ” федерал трассасида жойлашган кўприк қулаб тушган. Ҳаракат икки йўналишда ҳам тўлиқ ёпилган.

Дастлабки маълумотларга кўра, кўприк конструкцияси сув остида қолиб, оқим таъсирида ювилиб кетган.

Қидирув ишлари

Оператив хизматлар айрим одамларни сув оқими олиб кетган бўлиши мумкинлиги ҳақидаги хабарларни текширмоқда. Қидирув ишлари давом этмоқда.

Тўғон ёрилиши ҳудудда давом этаётган кучли ёмғир ва тошқинлар фонида юз берган. Аввалроқ расмийлар сув омбори тўлиб кетиши ва аҳоли пунктларига хавф туғилиши мумкинлиги ҳақида огоҳлантирган эди.