Ҳиндистонда кучли ёмғирлар оқибатида 62 киши ҳалок бўлди

28 сентябрь куни штатнинг айрим ҳудудларида мактаблар фаолияти вақтинча тўхтатилди. Қутқарувчилар сув босган ҳудудлардаги аҳолини хавфсиз жойларга эвакуация қилмоқда.

Фуқароларга сув босган ҳудудлар бўйлаб ҳаракатланмаслик, тез оқадиган дарёлар, сойлар ва сув оқова каналларидан узоқ туриш тавсия этилган.

Метеорология маркази маълумотларига кўра, штат пойтахти Лакхнауда ёғингарчилик бугундан бошлаб камайиши кутилмоқда. Бироқ штатнинг шарқий ва ғарбий ҳудудларида 29 сентябргача ёмғир ёғиши давом этиши мумкин.

Одиша ва Непалда ҳам табиий офатлар

Ҳиндистоннинг шарқидаги Одиша штатида ҳам сув тошқини кузатилган. Бу ерда 75 мингдан ортиқ киши хавфсиз ҳудудларга эвакуация қилинган.

Қўшни Непалда эса кучли ёмғирлар, сув тошқинлари ва кўчкилар оқибатида 21 киши ҳалок бўлган. Яна беш киши бедарак йўқолган, беш киши жароҳатланган.

Табиий офатлар мамлакатдаги 194 та уйга зарар етказган.

Эслатиб ўтамиз, 2026 йил май ойида ҳам Ҳиндистоннинг Уттар-Прадеш штатида кучли бўрон ва ёмғирлар оқибатида 111 киши ҳалок бўлган, 72 киши жароҳатланган эди. Ўшанда табиий офат тўққизта округда катта вайронагарчиликларга сабаб бўлган.