Фаластин қўмитаси Ғазони бошқариш бўйича асосий режаларини эълон қилди

АҚШ қўллаб-қувватлаётган Фаластин технократлар қўмитаси Ғазо секторининг келажакдаги бошқаруви бўйича ўз мақсад ва вазифаларини маълум қилди. Бу ҳақда Al Jazeera хабар берди.

Ғазо секторини бошқариш бўйича Миллий қўмита (NGAC) бош комиссари Али Шаатнинг айтишича, қўмита асосан урушдан зарар кўрган ҳудудларда ҳаётий муҳим хизматларни тиклаш билан шуғулланади.

Унинг сўзларига кўра, хавфсизликни таъминлаш, электр энергияси, сув таъминоти, соғлиқни сақлаш ва таълим тизимини қайта ишга тушириш асосий вазифалар қаторига киради. Шунингдек, тинчлик, адолат ва демократияга асосланган жамият қуриш мақсад қилинган.

Али Шаат қўмита фаолияти шаффофлик ва ҳалоллик тамойилларига асосланишини, иқтисодиётни тиклаш орқали ишсизликни камайтириш режалаштирилаётганини таъкидлади.

Маълумот учун, ушбу қўмита Доналд Трамп томонидан таклиф қилинган Ғазо бўйича 20 бандли тинчлик режаси доирасида ташкил этилган. Режа БМТ Хавфсизлик Кенгаши томонидан маъқулланган.

Трамп режасига кўра, Ғазони қайта тиклаш жараёни “Тинчлик кенгаши” томонидан назорат қилинади. Ушбу кенгаш таркибига АҚШ ва халқаро ташкилотларнинг юқори лавозимли вакиллари кирган. Ҳозирча кенгашда фаластинликлар ва аёллар йўқ.

Шунингдек, режада Ғазо секторида вақтинчалик халқаро бошқарув жорий этилиши ва халқаро барқарорлаштирувчи кучлар жойлаштирилиши кўзда тутилган. ҲАМАСнинг келажакда Ғазони бошқаришда иштирок этиши истисно этилган.