Burger King ходими «Free Palestine» дегани учун ишдан бўшатилди

АҚШнинг Пенсильвания штатидаги Брейнигсвилл шаҳрида жойлашган Burger King филиалида ходима билан мижоз ўртасидаги тортишув ижтимоий тармоқларда кенг тарқалди.

Тарқалган маълумотларга кўра, ўзини исроиллик деб таништирган мижоз ходима билан баҳслашган, воқеани видеога олган ва кейинчалик уни интернетга жойлаган. Ходима суҳбат давомида «Free Palestine» — «Фаластинга озодлик» деган фикрни билдирган.

Ходима ўзининг ижтимоий тармоқдаги саҳифасида ушбу воқеадан кейин ишдан бўшатилганини маълум қилган. У янги иш топгунга қадар ижара, коммунал тўловлар ва озиқ-овқат харажатларини қоплаш учун GoFundMe орқали хайрия йиғишни бошлаган.

Ижтимоий тармоқларда тарқалган маълумотларга кўра, акцияга бир неча кун ичида 3 мингдан ортиқ киши қўшилиб, 100 минг доллардан зиёд маблағ тўпланган. Кейинги постларда бу сумма янада ошгани ҳақида хабарлар пайдо бўлган. 

Ходиманинг таъкидлашича, у фақат Фаластин озодлигини қўллаб-қувватлаш фикрини билдирган ва мижозни ҳақорат қилиш ёки унга нисбатан камситиш нияти бўлмаган.

Ҳозирча Burger King компанияси ёки ушбу филиални бошқарувчи иш берувчи томонидан ходиманинг ишдан бўшатилгани ва воқеа сабаблари юзасидан расмий баёнот топилмади.