Франциядаги Ренуар музейидан 10 миллион долларлик асарлар ўғирлаб кетилди

8 сентябрь куни Франциянинг жанубида икки ўғри француз импрессионист рассоми Пьер-Огюст Ренуарга бағишланган музейга бостириб кириб, “тўртта санъат асарини” ўғирлади. Мернинг сўзларига кўра, улар қочиш чоғида асарлардан бирини тушириб қолдирган.

“Бугун эрталаб икки шахс Ренуар музейига бостириб кириб, тўртта санъат асарини ўғирлаб кетди”, – деди Кан-сюр-Мер шаҳрининг мэри Брайан Массон.

Ўғирланган асарларнинг қиймати 9 миллион еврога (10 миллион доллар) баҳоланмоқда.

Ренуар музейи 1960 йилда, рассомнинг 1919 йилда вафот этишидан аввал яшаган уйида очилган.

Унинг коллекциясидан Ренуарга тегишли бўлган буюмлар ва мебеллар, жумладан, унинг мольберти, ногиронлик аравачаси, рассом чизган портретлар, манзаралар ва яланғоч аёллар тасвирланган суратлар ўрин олган.

Мернинг сўзларига кўра, ҳокимият вакилларининг етиб келиши учун атиги беш дақиқа кифоя қилган.

Музей сигнализацияси тонгги соат 5:48 да ишга тушган. Орадан беш дақиқа ўтиб, 5:53 да шаҳар полицияси воқеа жойида ҳозир бўлган.

Бу ўғирлик Париждаги Лувр музейидан кундуз куни содир этилган талончиликда тахминан 100 миллион долларлик саккизта буюм ўғирланганига ҳали бир йил тўлмасдан юз берди.

Луврдаги ўғирликка алоқадорликда гумонланган тўрт киши ҳибсга олинган, бироқ француз терговчилари Париж ҳудудида кенг кўламли қидирувлар олиб боргани ва Бельгия, Италия ҳамда бошқа мамлакатлар полицияси билан маълумот алмашганига қарамай, ўғирланган ашёлар ҳанузгача топилмаган.