Fransiyadagi Renuar muzeyidan 10 million dollarlik asarlar o‘g‘irlab ketildi

8-sentyabr kuni Fransiyaning janubida ikki o‘g‘ri fransuz impressionist rassomi Per-Ogyust Renuarga bag‘ishlangan muzeyga bostirib kirib, “to‘rtta san’at asarini” o‘g‘irladi. Merning so‘zlariga ko‘ra, ular qochish chog‘ida asarlardan birini tushirib qoldirgan.

“Bugun ertalab ikki shaxs Renuar muzeyiga bostirib kirib, to‘rtta san’at asarini o‘g‘irlab ketdi”, – dedi Kan-syur-Mer shahrining meri Brayan Masson.

O‘g‘irlangan asarlarning qiymati 9 million yevroga (10 million dollar) baholanmoqda.

Renuar muzeyi 1960-yilda, rassomning 1919-yilda vafot etishidan avval yashagan uyida ochilgan.

Uning kolleksiyasidan Renuarga tegishli bo‘lgan buyumlar va mebellar, jumladan, uning molberti, nogironlik aravachasi, rassom chizgan portretlar, manzaralar va yalang‘och ayollar tasvirlangan suratlar o‘rin olgan.

Merning so‘zlariga ko‘ra, hokimiyat vakillarining yetib kelishi uchun atigi besh daqiqa kifoya qilgan.

Muzey signalizatsiyasi tonggi soat 5:48 da ishga tushgan. Oradan besh daqiqa o‘tib, 5:53 da shahar politsiyasi voqea joyida hozir bo‘lgan.

Bu o‘g‘irlik Parijdagi Luvr muzeyidan kunduz kuni sodir etilgan talonchilikda taxminan 100 million dollarlik sakkizta buyum o‘g‘irlanganiga hali bir yil to‘lmasdan yuz berdi.

Luvrdagi o‘g‘irlikka aloqadorlikda gumonlangan to‘rt kishi hibsga olingan, biroq fransuz tergovchilari Parij hududida keng ko‘lamli qidiruvlar olib borgani va Belgiya, Italiya hamda boshqa mamlakatlar politsiyasi bilan ma’lumot almashganiga qaramay, o‘g‘irlangan ashyolar hanuzgacha topilmagan.