Google СИ инфратузилмасини кенгайтиради

Маълумотларга кўра, битим нақд пул асосида амалга оширилган ва мавжуд қарз мажбуриятлари ҳам Google зиммасига ўтган. Intersect Power битимдан сўнг мустақил компания сифатида фаолиятни давом эттиради, бироқ Google’нинг асосий энергетик шеригига айланади.

Intersect Power коммунал миқёсдаги қуёш электр станциялари, аккумулятор сақлаш тизимлари ва интеграциялашган энергия инфратузилмасини лойиҳалаш, қуриш ва бошқаришга ихтисослашган. Компания лойиҳалари йирик электр истеъмолчилари, жумладан дата-марказлар ёнида жойлаштириш учун мўлжалланган.

Таҳлилчиларга кўра, ушбу харид Google’нинг «яшил имидж» стратегиясидан кўра, сунъий интеллект ривожидаги асосий тўсиқ — узлуксиз ва етарли электр таъминоти муаммосини ҳал қилишга қаратилган.

 AI дата-марказлари анъанавий булутли хизматларга нисбатан бир неча баробар кўпроқ энергия талаб қилади, мавжуд электр тармоқлари эса бу суръатга улгурмаяпти.

Google шу орқали дата-марказлар ёнида қуёш станциялари ва аккумуляторлардан иборат хусусий энергия манбаларини жойлаштириб, умумий электр тармоқларига боғлиқликни камайтиришни режалаштирмоқда.

Аввалроқ Microsoft атом ва қайта тикланувчи энергия бўйича узоқ муддатли келишувлар имзолаган, Amazon эса қайта тикланувчи энергия лойиҳаларига тўғридан-тўғри инвестициялар киритган эди.

 Google’нинг мазкур қарори эса технология компаниялари энергия инфратузилмасини стратегик ресурс сифатида қабул қила бошлаганини кўрсатмоқда.