Покистонда фургон автобусга урилди

Душанба куни Покистоннинг шимоли-ғарбида содир бўлган йўл-транспорт ҳодисасида камида 17 киши ҳалок бўлиб, 10 киши жароҳатланди, дея хабар берди расмийлар.

Воқеа Хайбар-Пахтунхва вилоятида Сватдан Пешоварга қатнаётган йўловчи автобуси техник носозлик сабаб йўл четида тўхтаганида юз берган.

Йўловчилар автобусдан тушиб, яқин атрофда кутиб турган бир пайтда фургон бошқарувни йўқотиб, оломонга ва тўхтаб турган автобусга бориб урилган.

“Камида 17 киши ҳалок бўлди, 10 дан ортиқ киши жароҳатланди”, – деди қутқарув хизмати ходими Билол Аҳмад Файзий AFP агентлигига ва жароҳатланганлардан уч нафарининг аҳволи оғир эканлигини қўшимча қилди.

Жабрланувчиларни қабул қилаётган маҳаллий шифохона шифокори Муҳаммад Али ҳам ҳалок бўлганлар сонини тасдиқлади.

Йўловчиларнинг аксарияти мусулмон тақвимидаги энг муҳим диний байрамлардан бири бўлган Ҳайит арафасида уйларига қайтаётган эди.

Покистонда йўл ҳаракати қоидаларига риоя этилмаслиги, тезликни ошириш, йўл ҳаракати хавфсизлиги меъёрларининг сустлиги ва эҳтиёткорликсиз ҳайдаш туфайли йўл-транспорт ҳодисалари кўп содир бўлади.