Pokistonda furgon avtobusga urildi

Voqea Xaybar-Paxtunxva viloyatida Svatdan Peshovarga qatnayotgan yo‘lovchi avtobusi texnik nosozlik sabab yo‘l chetida to‘xtaganida yuz bergan.

Yo‘lovchilar avtobusdan tushib, yaqin atrofda kutib turgan bir paytda furgon boshqaruvni yo‘qotib, olomonga va to‘xtab turgan avtobusga borib urilgan.

“Kamida 17 kishi halok bo‘ldi, 10 dan ortiq kishi jarohatlandi”, – dedi qutqaruv xizmati xodimi Bilol Ahmad Fayziy AFP agentligiga va jarohatlanganlardan uch nafarining ahvoli og‘ir ekanligini qo‘shimcha qildi.

Jabrlanuvchilarni qabul qilayotgan mahalliy shifoxona shifokori Muhammad Ali ham halok bo‘lganlar sonini tasdiqladi.

Yo‘lovchilarning aksariyati musulmon taqvimidagi eng muhim diniy bayramlardan biri bo‘lgan Hayit arafasida uylariga qaytayotgan edi.

Pokistonda yo‘l harakati qoidalariga rioya etilmasligi, tezlikni oshirish, yo‘l harakati xavfsizligi me’yorlarining sustligi va ehtiyotkorliksiz haydash tufayli yo‘l-transport hodisalari ko‘p sodir bo‘ladi.