Жиззахда Gentra дарахтга урилиши оқибатида 21 ёшли блогер қиз вафот этди

Жиззах шаҳрида Gentra иштирокида ўлим билан якунланган йўл-транспорт ҳодисаси юз берди. Автоҳалокат оқибатида 21 ёшли блогер Орзигул Уразматова ҳалок бўлди. Бу ҳақда Жиззах ИИБ ЖХХ ЙҲХБ ахборот хизмати хабар қилди.

Маълум қилинишича, ҳодиса 5-август куни соат 03:00 ларда Жиззах шаҳридаги “Ўратепалик” МФЙ ҳудудидан ўтувчи йўлда содир бўлган. Шароф Рашидов туманида яшовчи, 2005-йилда туғилган ҳайдовчи О.У. (Орзигул Уразматова) ўзига тегишли Gentra автомашинасини бошқариб кетаётиб, рул бошқарувини йўқотган. Оқибатда транспорт воситаси йўлнинг ўнг томонидаги дарахтга бориб урилган.

ЙТҲ оқибатида оғир тан жароҳатлари олган ҳайдовчи Жиззах вилояти тиббиёт бирлашмасининг жонлантириш бўлимига ётқизилган. Бироқ шифокорлар томонидан кўрсатилган тиббий муолажаларга қарамасдан, у вафот этган.

Шунингдек, автомашинада йўловчи сифатида бўлган 18 ёшли И.М. (2008-йилда туғилган) шифохонага ётқизилган бўлиб, унга зарурий тиббий муолажалар кўрсатилмоқда.

Ҳозирда мазкур ҳолат юзасидан Жиззах шаҳар ИИБ Тергов бўлими томонидан терговга қадар текширув ҳаракатлари олиб борилмоқда.