Путин ядровий кучлар бошқаруви бўйича режали машқлар ўтказилганини маълум қилди

Кремл матбуот хизмати хабарига кўра, «Россия Федерацияси Қуролли Кучларининг Олий Бош қўмондони Владимир Путин раҳбарлигида стратегик ядровий кучлар машқи ўтказилди, унда қуролли кучларнинг ер, денгиз ва ҳаво таркибий қисмлари иштирок этди», — дейилади баёнотда.

Маълумотга кўра, машқлар давомида қитъалараро баллистик ракеталар ва ҳаво базасидаги қанотли ракеталарнинг амалий учиришлари амалга оширилган.

Плесецк давлат космодромидан Камчаткадаги “Кура” полигонига «Ярс» қитъалараро баллистик ракета учирилган. Шунингдек, Баренц денгизи акваториясидаги “Брянск” номли атом ракета сувости кемасидан «Синева» баллистик ракета учирилган. Машқларда Ту-95МС стратегик бомбардимончи самолётлари ҳам қатнашиб, ҳаво базасидаги қанотли ракеталарни учириш амалиётларини бажарган.

Амалиётларнинг бошқаруви Россия Миллий мудофаа бошқарув марказидан амалга оширилган.

Кремл баёнотида таъкидланишича, машқлар чоғида ҳарбий бошқарув органларининг тайёргарлик даражаси ҳамда қўмондонлик таркибининг амалиётни бошқариш бўйича кўникмалари текширилган. Барча вазифалар муваффақиятли бажарилган.

Россия Бош штаби бошлиғи Валерий Герасимовнинг айтишича, машқларда «Ярс» ракета мажмуалари, «Брянск» сувости кемаси ва Ту-95МС самолётлари иштирок этган.

Унинг сўзларига кўра, машқларда ядровий қуролни қўллаш бўйича қарор қабул қилиш тартибини амалда синовдан ўтказиш назарда тутилган. Бунда ҳаракатчан «Ярс» мажмуалари, Баренц денгизи акваториясидаги “Брянск” сувости кемаси ва Ту-95МС стратегик самолётлари амалий ҳаракатларни бажарган.