Қозоғистонда йўқолган ҳарбий вертолёт бўлаклари топилди

Қайд этилишича, қидирув ишларининг асосий объекти сифатида айнан ушбу сув омбори олинган. Чунки шу ерда фавқулодда вазиятлар вазирлиги ходимлари вертолётнинг илк бўлакларини топган.

Қозоғистон Мудофаа вазирлиги маълумотига кўра, бу сўнгги йилларда мамлакатда ўтказилаётган энг йирик қидирув амалиётларидан бири. Унда 400 га яқин киши (Мудофаа вазирлиги, Фавқулодда вазиятлар вазирлиги, Ички ишлар вазирлиги ходимлари), 70 дан ортиқ ерусти техникаси, 21 та сув транспорти, 10 та учувчисиз учиш аппарати, сув ости сканерлари, эхолотлар ҳамда хизмат итлари иштирок этмоқда.

Сорбулак Мустақил давлатлар ҳамдўстлигидаги (МДҲ) энг йирик сунъий оқова сув тўплаш омбори ҳисобланади. Унинг айрим жойлари 22 метр чуқурликка эга, туби лой билан қопланган, сув алмашинуви деярли йўқ, кўриш имконияти эса ноль даражада. Шу сабабли сувости гуруҳлари асосан сезги билан ишламоқда.

«Мутахассислар сув ҳавзаси ва қирғоқ бўйидаги, шу жумладан, чуқур ва ёндашиш қийин бўлган жойларни ҳам текшириб чиқмоқда. Қидирув ишлари кеча-ю кундуз, тўхтовсиз олиб борилмоқда. Операцияни Қозоғистон қуролли кучлари ҳарбий-ҳаво кучлари қўмондони, авиация генерал-майори Асқар Избасов шахсан бошқариб бормоқда. У ҳодиса жойида бўлиб, барча иштирокчи бўлинмаларга раҳбарлик қилмоқда», — дейилади Мудофаа вазирлиги хабарида.

Ҳодиса жойида йўқолган вертолёт экипажи аъзоларининг оилалари ҳам бор. Уларга доимий равишда аниқ маълумотлар тақдим этилмоқда. 28 июль куни улар билан биргаликда қидирув ҳудуди бўйлаб ҳаводан кўздан кечириш амалга оширилган. Ижтимоий тармоқларда тарқалган видеоларда яқинлари қидирувлар тўхтатилмаганини тасдиқламоқда.

Мудофаа вазирлиги қидирув-қутқарув операцияси якуний натижаларга эришилмагунча давом эттирилишини маълум қилди.

Эслатиб ўтамиз, жорий йилнинг 25 июль куни Олмаота вилоятидаги “Луговое” аэродромидан ҳавога кўтарилган EC-145 русумдаги ҳарбий вертолёт радарлардан ғойиб бўлган эди.