Рим папаси Фаластин давлатини тан олишга чақирди

Бу ҳақда у Туркиядан Ливанга парвоз вақтида журналистлар саволларига жавоб берди.

Папанинг айтишича, Ватикан ҳар икки томон билан дўст сифатида мулоқот қилиб, адолатли ечимга эришишда воситачилик қилишга тайёр.

«Ҳаммамиз биламизки, Исроил бу қарорни ҳозирча қабул қилмаяпти. Аммо биз Фаластин давлатини тан олиш — можарони ҳал қилишнинг ягона тўғри йўли деб ҳисоблаймиз», — деди Лев XIV.

Бу Рим папаси сайлангандан кейинги биринчи хорижий ташрифи бўлиб, 27 ноябрда Туркияда бошланган ва 2 декабрда Ливанда давом этмоқда.

Ватикан Фаластинни аввалдан тан олган

Ватикан Фаластин давлатини 2015 йилда расман тан олган. Бу Франциск папа таxтига чиққанидан икки йил ўтгач амалга оширилган. Маълумотларга кўра, Ватикан амалда 2013 йилдан бошлаб Фаластинни тан олган, ўша йили Фаластин БМТда кузатувчи мақомини олган.

Исроил эса ўша пайтда Ватиканнинг мазкур қарори Яқин Шарқдаги тинчлик жараёнига ёрдам бермаслигини билдирган.

Исроил позицияси ўзгармаган

Исроил бош вазири Биньямин Нетаньяҳу ноябрь ойи ўрталарида Фаластин давлатига қарши эканини яна бир бор такрорлаган. У сентябр ойида БМТ Бош Ассамблеясида ҳам Франция, Буюк Британия, Австралия ва Канада томонидан Фаластинни тан олишни «шармандали қарор» деб атаган эди.